ՀՀ վարչապետին են դիմել Երեւանի 2-րդ Աղյուսագործների 84, 86, 88 տունը սեփականության իրավունքով տիրապետող, օգտագործող քսան բնակիչները:
Նրանց ստորագրություններով բաց նամակը երեկ տրամադրվել է նաեւ «Առավոտին»: Բնակիչները նշյալ տարածքը տիրապետում են անցյալ դարի 70-ականներից:
Բնակիչները տեղեկացնում են. «Մեր հարեւանությամբ Ռոստոմի 91 տանը բնակվում են ՀՀ վճռաբեկ դատարանի նախկին դատավոր Ելենա Սողոմոնյանը, նրա որդին` Երեւան քաղաքի ընդհանուր իրավասության դատարանի դատավոր Հարություն Մանուկյանը, եւ այլք: Նրանց տարածքով անհիշելի ժամանակներից անցնում է հիշյալ տարածքի բնակիչներիս կոյուղին: Այս պահի դրությամբ Ռոստոմի 91 տան բնակիչներն ամբողջական աղյուսներով, շինարարական աղբով, եւ այլնով, աշխատանքներ են կատարել, միտումնավոր խցափակել են կոյուղին, առկա չէ հնարավորություն կեղտաջրերը հեռացնելու համար, ստեղծվել է սանիտարահամաճարակային վտանգ: Դիմել ենք «Վեոլիաջրին», Կենտրոն թաղապետարանին, որի ներկայացուցչի հետ փորձել ենք մտնել նրանց բակը, սակայն նրանք նույնիսկ դարպասների դռները չեն բացել, ՄԻՊ-ին, ԱՆ հիվանդությունների վերահսկման եւ կանխարգելման կենտրոնին»:
Բնակիչները խնդրում են վարչապետի անմիջական միջամտությունը եւ աջակցությունը խնդրի լուծման համար, քանի որ ըստ նրանց՝ վտանգված է իրենց թե առողջությունը, թե կյանքը: Ըստ նրանց՝ ինքնիրավչության հիմքով պատասխանատվության պետք է ենթարկել հիշյալ ապօրինության հեղինակներին:
Կարդացեք նաև
Բնակիչներ
«Առավոտ» օրաթերթ,
11.07.2019
