«Իրավիճակն օրենքի ուժով մի փոքր անլուծելի է՝ կապված այն փաստի հետ, որ տիկին Նախշուն Տավարացյանը չի երդվել։ Փաստորեն մենք ունենք ընտրված բարձրագույն դատական խորհրդի անդամ, որը, սակայն, դեռեւս չի սկսել իրականացնել պաշտոնեական պարտականությունները, քանի որ նա դեռեւս չի երդվել։ Մյուս կողմից՝ մենք ունենք իրավիճակ, որ դեռեւս դադարեցված չեն այդ անդամի լիազորությունները, հետեւաբար իրավիճակը պետք է լուծում ունենա»,- այսօր Դատավորների ընդհանուր ժողովից առաջ, լրագրողների հետ զրույցում ասաց ՀՀ վերաքննիչ քաղաքացիական դատարանի նախագահ Արսեն Մկրտչյանը:
Արսեն Մկրտչյանը չբացառեց, որ Դատավորների ընդհանուր ժողովում այդ հարցն էլ լուծում ստանա:
Հիշեցնենք, մամուլում հրապարակումներ եղան, որ 9 ամիս առաջ գրավոր դիմումով Բարձրագույն դատական խորհրդի (ԲԴԽ) անդամ դառնալուց հրաժարված Վճռաբեկ դատարանի դատավոր Նախշուն Տավարացյանը դատավորների ընդհանուր ժողովի ընթացքում պատրաստվում է երդում տալ։
Նելլի ԳՐԻԳՈՐՅԱՆ
