Ինչպես տեղեկացրել ենք, այսօր ԱԺ արտաքին հարաբերությունների հանձնաժողովի անդամները ասուլիս էին հրավիրել՝ խոսելու Լեհաստան կատարած այցի մասին:
«Լուսավոր Հայաստան» խմբակցության պատգամավոր Արման Բաբաջանյանը շատ հիասթափված էր: Ըստ նրա, լեհերի հետ պատշաճ աշխատանք չի տարվել ոչ արտգործնախարարության, դեսպանների, ոչ էլ խորհրդարանականների մակարդակով. «Վիզաների ազատականացման հարցում պետք է հիասթափեցնեմ բոլորիս, լեհերը մեզ չեն պաշտպանելու այդ հարցում, որովհետեւ շատ կոնկրետ հարցադրումներ ունեն ընդհանրապես մեր արտաքին քաղաքականության, ընդհանրապես մեր հանձնառությունների վերաբերյալ»:
«Իմ քայլի» պատգամավոր Սոս Ավետիսյանն ասաց, որ ամեն դեպքում մի լավ ուղերձ կար, որ ՀՀ-ում վիզաների ազատականացման գործընթացը չպետք է կապվի այլ երկրներում ունեցած փորձի հետ:
Լրագրողները հետաքրքրվեցին՝ այսինքն, վիզաների ազատականացմանը լեհերը խոչընդոտելո՞ւ են՝ Արման Բաբաջանյանը պատասխանեց. «Ես չեմ ասում, որ չի ազատականացվի, բայց առնվազն 2020-ի մասով հույսներս կտրենք: Կան խնդիրներ, որոնք ես այս պահին չեմ կարող բարձրաձայնել, դա մեր անվտանգությանն է առնչվում: Լայն շրջանակ կա անկեղծ խոսակցության՝ հասկանալու, թե այն փոփոխությունները, որոնք տեղի են ունեցել մեր երկրում, որքանով կարող են կարգի բերել արտաքին քաղաքական մասը՝ ԵՄ-ի եւ ԵՄ առանձին երկրների հետ համագործակցության հարցում: Խնդիրներ կան, չպետք է հապաղել, կարող ենք հասնել հաջողության, եթե աշխատանք տարվի»:
Կարդացեք նաև
Հռիփսիմե ՋԵԲԵՋՅԱՆ
