Այսօր կառավարության նիստում ԱԱԾ ղեկավար Արթուր Վանեցյանը վարչապետին ասաց, որ իր կողմից հանձնարարություն է տրվել, որպեսզի նյութեր նախապատրաստվեն երեկ էլեկտրաէներգիայի տատանումների, անջատումների հետ կապված: Վանեցյանն ասաց, որ նպատակը էներգետիկ համակարգի խափանման պատճառները պարզելն է:
«Չնայած նախնական տվյալներ կան, բայց ես կարծում եմ, որ պետք է խորը ուսումնասիրություն իրականացվի, հետաքննություն անցկացվի, տրվի գնահատական՝ միտում եղե՞լ է, թե՝ ոչ, կա՞ն մեղավորներ, ցուցաբերվե՞լ է անգործություն, թե՞ ոչ: Արդյունքների մասին կտեղեկացնեմ»,- ասաց Արթուր Վանեցյանը:
Վարչապետ Փաշինյանն ասաց, որ երեկ ժամը 20:00-ի մոտակայքում ամբողջապես վերականգնվել էր ողջ էներգահամակարգի գործունեությունը. «Շնորհակալություն եմ ուզում հայտնել Իրանի ու Վրաստանի մեր գործընկերներին, որոնք օպերատիվ աջակցեցին, հնարավոր եղավ խուսափել այնպիսի հետեւանքներից, երբ էներգետիկ համակարգը երկարատեւ կոլապսի առաջ է կանգնում: Երբ քննարկում էինք փոխարկիչի հետ կապված խնդիրը, մասնագետները նման իրավիճակ նկարագրում էին: Այնպես որ, պրակտիկ առումով այդ քննարկման ժամանակ եղած տեսական իրավիճակը երեկ տեղի ունեցավ: Մեր էներգետիկ համակարգը ցուցաբերեց բավարար ճկունություն, կենսունակություն, ուղղակի պետք է հասկանալ վթարի պատճառները»,- նշեց Նիկոլ Փաշինյանը:
Ըստ Փաշինյանի, կա երկու վարկած, որոնց թվում ներքին պատճառներ չկան:
Կարդացեք նաև
Տարածքային կառավարման եւ զարգացման նախարար Սուրեն Պապիկյանը արձագանքելով հարցին, ասաց, որ կառավարության նիստից առաջ ստեղծվել է աշխատանքային խումբ, որը կպարզի՝ որոնք են եղել խափանման իրական պատճառները:
Լուսինե ԲՈՒԴԱՂՅԱՆ
