2020 թվականի հունվարի մեկից 10 տոկոսով կենսաթոշակները կբարձրանան։ Այսօր նախքան կառավարության նիստի օրակարգին անցնելն՝ ասաց վարչապետ Նիկոլ Փաշինյանը` նշելով, որ երեկ կառավարությունը հաստատել է 2020-2022 թվականների միջնաժամկետ ծախսերի ծրագիրը։
Սեպտեմբերի 1-ից էլ կբարձրանան ուսուցիչների աշխատավարձերը։ Վարչապետի խոսքով, նաև որոշում է կայացվել մեկ ծրագրի շրջանակներում լուծել 1988-ի երկրաշարժից տուժած ընտանիքների խնդիրը, որոնք դեռևս բնակարան չեն ստացել պետության կողմից։ Այդ նպատակով կհատկացվի երեք միլիարդ դրամ։
Նիկոլ Փաշինյանն ասաց, որ հունիսի 1-ից բարձրացել են զինվորականների աշխատավարձերը։
Վարչապետը ասաց, որ կարևոր խնդիրներից մեկն այսօր ներառական տնտեսական աճի ցուցանիշների ճանապարհային քարտեզ ունենալն է. «Այդ խնդրի լուծման հիմնական միջոցը մենք տեսնում ենք վերամշակող արդյունաբերության զարգացման, տեխնոլոգիական արդյունաբերության զարգացման և զբոսաշրջության զարգացման ուղղություններով։ Խոսքն այն ձեռնարկությունների մասին է, որոնք հումքից ստանում են վերջնական արտադրանք»։
Կարդացեք նաև
Նիկոլ Փաշինյանն ասաց, որ Վիետնամ և Սինգապուր կատարած այցի շրջանակներում քննարկել են այդ թեմաները. «Մինչև օգոստոսի 20-ը այդ ընկերությունների ներկայացուցիչների հետ կունենանք հանդիպում, աշխատանքային քննարկում, թե ինչ քայլեր ունի կառավարությունը մշակող արդյունաբերությանն աջակցելու և արտահանմանը միտված նրանց գործունեությանը խթանելու ուղղությամբ»։
Լուսինե ԲՈւԴԱՂՅԱՆ
