Հանրապետության նախագահ Արմեն Սարգսյանը հուլիսի 9- ին հանդիպում -ճաշ է ունեցել «Օրրան» բարեգործական կազմակերպության հիմնադիր Արմինե Հովհաննիսյանի, «Օրրանի» բարերար Կարո Մարտիրոսյանի և նրա ընտանիքի անդամների հետ։
Այն ծրագրվել էր դեռ անցյալ տարի սեպտեմբերին՝ ԱՄՆ –ում «Օրրանի» նախաձեռնած դրամահավաք– ճաշկերույթին:
Ճաշկերույթի ընթացքում կազմակերպվել է աճուրդ, որի ժամանակ մասնակիցներին ներկայացվել են բազմաթիվ յուրահատուկ առաջարկ-լոտեր։ Դրանց շարքում թերևս ամենահետաքրքիրը եղել է «Ճաշ ՀՀ Նախագահի հետ» լոտը, որը «բաժին է հասել» «Օրրանի» վաղեմի բարեկամ Կարո Մարտիրոսյանին։
«Շատ գովելի և ողջունելի է նախագահ Արմեն Սարգսյանի այս բարեգործական քայլը, որը ոչ միայն նշանակում է ինքնատիպ ձևով մասնակից դառնալ կարիքավոր քաղաքացիներին ձեռք մեկնելուն, այլև նպաստում է նոր մշակույթի ձևավորմանը»,- անդրադառնալով Հանրապետության նախագահի հետ ճաշին՝ նշել է «Օրրանի» հիմնադիր Արմինե Հովհաննիսյանը:
Կարդացեք նաև
Ճաշկերույթ- դրամահավաքի ընթացքում հանգանակված ամբողջ, այդ թվում և՝ վերոհիշյալ լոտից ստացված գումարն ուղղվելու է «Օրրանի» շահառու 300 կարիքավոր երեխաների և տարեցների սոցիալական հարցերի լուծմանը:
Մամուլի հաղորդագրություն
