«Անդրադառնամ մեր ընդդիմադիր գործընկերոջ ասածին՝ էդ ի՞նչ եք անում, էդ ի՞նչ եք անո՜ւմ… Ի՞նչ ենք անում, գրասենյակն առանձնացվում է, որ ավելի էֆեկտիվ աշխատի: Եթե դու չիմանաս ինչի մասին է խոսքը, լսես միայն պարոն Մարուքյանի «էս ի՞նչ եք անում» արտահայտությունը, շատ վատ տպավորություն է ստեղծվում»,- «Իմ քայլի» պատգամավոր Վաղարշակ Հակոբյանն այսպես պատասխանեց «Լուսավոր Հայաստան» խմբակցության ղեկավար Էդմոն Մարուքյանի քննադատությանը:
Հիշեցնենք, որ ՄԻԵԴ-ում ՀՀ ներկայացուցչի հարցն էր քննարկվում, ներկայացուցչի գրասենյակը կառավարությունը մտադիր է առանձնացնել, նաեւ ներկայացուցչի համար սահմանել է որոշակի պահանջներ՝ առանց ամրագրելու ստաժի պահանջը, ներկայացուցչի տարիքն էլ սահմանել է 25 տարեկան: ԲՀԿ-ն առաջարկել է ամրագրել, որ 30 տարին լրացած անձը կարող է լինել ՄԻԵԴ-ում ՀՀ ներկայացուցիչ: Վաղարշակ Հակոբյանի խոսքով՝ կարող է բոլոր պահանջներին բավարարում է, 6 ամիս է մնում, որ լինի 30 տարեկան ու դա խանգարի. «Վերջ, էլ ինքը չի կարա լինի ՄԻԵԴ-ում ՀՀ ներկայացուցիչ, դա ճի՞շտ է: Էս խորհրդարանի միջին տարիքը 36 է, մի հատ օրենք ընդունենք, որ 40 տարեկանից բարձր պատգամավոր ընտրվելու իրավունք չունեն, ձեր դուրը կգա՞: Դա ճիշտ մոտեցում չի»:
Հակոբյանն ասաց, որ «այս փաթեթավորմամբ» օրենքի նախագծին ինքը դեմ է քվեարկելու, որովհետեւ գտնում է, որ ստաժի հետ կապված փոփոխությունը ճիշտ է, բայց տարիքի սահմանափակումը՝ սխալ: Տարիքից կախված՝ չպետք է արգելել մարդուն, որ նա մասնակցություն ունենա պետական ապարատում:
Կարդացեք նաև
Հռիփսիմե ՋԵԲԵՋՅԱՆ
