2016թ.-ին ՀՀ ոստիկանության ՊՊԾ գունդը գրաված եւ մի շարք հանցագործությունների կատարման համար մեղադրվող «Սասնա ծռեր» զինված խմբի գործով հերթական դատական նիստում այսօր մեղադրյալներից Մխիթար Ավետիսյանը կրկին չէր ներկայացել՝ առողջական խնդիրներով գտնվում էր հիվանդանոցում: Դատավոր Մեսրոպ Մակյանը հիշեցրեց, որ նախորդ նիստում եւս նա ներկա չէր, իսկ այս նիստում ԲԿ-ից տեղեկանք է ստացվել այն մասին, որ Մխիթար Ավետիսյանը հոսպիտալացվել է մի շարք առողջական խնդիրներով, նա վիրահատվել է. «Առկա է կոնքի խոռոչի օրգանների ֆունկցիայի խանգարում: Հիվանդին հարկավոր է կոնսերվատիվ բուժում՝ երկու ամիս ժամկետով»:
Մեսրոպ Մակյանն արձանագրեց, որ Մխիթար Ավետիսյանի բուժումը երկար է տեւելու, եւ պետք է քննարկել առանց նրա մասնակցության նիստեր անելու հարցը:
Այս գործով մեղադրող-դատախազ Պետրոս Պետրոսյանն իրավիճակի վերաբերյալ նշեց. «Հաշվի առնելով ողջամիտ ժամկետներում գործի քննության անհրաժեշտությունը՝ միջնորդում եմ Մխիթար Ավետիսյանի հանդեպ նշանակել դատաբժշկական փորձաքննություն՝ պարզելու համար հիվանդությունների առկայությունը եւ արդյոք դրանք խոչընդոտում են Մխիթար Ավետիսյանի՝ դատական նիստերին մասնակցելուն»: Մեղադրողը չբացառեց, որ Մխիթար Ավետիսյանի մասը գուցե գործից անջատ քննվի:
Դատարանը հեռացավ խորհրդակցական սենյակ՝ Մխիթար Ավետիսյանի հանդեպ դատաբժշկական փորձաքննություն նշանակելու վերաբերյալ միջնորդության առնչությամբ որոշում կայացնելու:
Կարդացեք նաև
Դատավոր Մեսրոպ Մակյանը, վերադառնալով խորհրդակցական սենյակից, որոշեց դատախազի միջնորդությունը բավարարել եւ Մխիթար Ավետիսյանի հանդեպ նշանակել դատաբժշկական փորձաքննություն, կատարումը վերապահել Առողջապահության նախարարության «Դատաբժշկական գիտագործնական կենտրոն» ՊՈԱԿ-ին՝ առաջադրելով մի շարք հարցեր
-Հիվանդություններ ունի՞ Մխիթար Ավետիսյանը,
-Եթե այո, ի՞նչ հիվանդություններով է տառապում,
-Հայտնաբերված հիվանդությունը կարո՞ղ է խոչընդոտել դատական նիստերին մասնակցելուն, թե ոչ,
-Եթե մասնակցությունը հնարավոր է, որքա՞ն ժամանակով կարող է նա մասնակցել նիստերին,
-Եթե մասնակցությունը հնարավոր չէ, բուժումը որքա՞ն ժամանակ կարող է տեւել:
https://www.facebook.com/aravot.am/videos/435802513937272/
Լուիզա ՍՈՒՔԻԱՍՅԱՆ
