Լեռնային Ղարաբաղի հիմնահարցը ռազմական լուծում չունի, այն կարող է ստանալ միայն քաղաքական կարգավորում՝ համաձայն միջազգային իրավունքի և նորմերի: Այս մասին հայտարարել է Եվրամիության խորհրդի նախագահ Դոնալդ Տուսկը Ադրբեջան կատարած այցի շրջանակում այդ երկրի նախագահ Իլհամ Ալիևի հետ հանդիպումից հետո:
«Եվրամիությունը շարունակում է լիարժեք աջակցել ԵԱՀԿ Մինսկի խմբի՝ արդարացի և հարատև լուծում գտնելու ջանքերին՝ հիմնված Հելսինկյան եզրափակիչ արձանագրության հիմնարար սկզբունքների վրա»,- ասել է Տուսկը:
Նա ողջունել է լարվածության ընդհանուր նվազեցումը, բայց նաև մտահոգություն է հայտնել վերջին շրջանում շփման գծում զոհերի կապակցությամբ: «Զսպվածությունը կարևոր է, ինչպես որ կարևոր են խաղաղության համար կառուցողական և բանակցությունների համար նպաստավոր մթնոլորտ ստեղծելուն ուղղված քայլերը: ԵՄ-ն արդեն աջակցում է խաղաղաշինության գործողություններին և պատրաստ է սատարել կոնկրետ քայլերի՝ ուղղված բնակչությանը խաղաղության նախապատրաստելուն»,- ասել է Տուսկը:
ԵՄ խորհրդի նախագահը միաժամանակ հիշեցրել է, որ «ԵՄ-ը պաշտպանում է Ադրբեջանի ինքնիշխանությունը, անկախությունն ու տարածքային ամբողջականությունը»:
Կարդացեք նաև
Տուսկը նաև խոսել է ԵՄ-Ադրբեջան գործակցությունից՝ նշելով, որ երկկողմ հարաբերություններն ակտիվացել են, և իր այցը հենց դրա մասին է խոսում: Նա հույս է հայտնել, որ ԵՄ-Ադրբեջան նոր համաձայնագիրը կբարձրացնի գործընկերության մակարդակը, ինչը կծառայի ի շահ ժողովուրդների:
«Այսօր նախագահ Ալիևի հետ քննարկումներում ես վերահաստատել եմ ԵՄ պատրաստակամությունը հետագայում խորացնել գործընկերությունն Ադրբեջանի հետ՝ ընդգծելով օրենքի գերակայության, մարդու իրավունքների և հիմնարար ազատությունների նկատմամբ հարգանքի կարևորությունը: ԵՄ-ը հավատում է, որ իրական բաց հասարակությունը լավագույն երաշխիքն է երկարատև կայունության և լավ կյանքի համար»,- ասել է Տուսկը:
Պատրաստեց՝ Վիկտորյա ԱՆԴՐԵԱՍՅԱՆԸ
