Ի՞նչ նորություն կա երրորդ երկրներից ներմուծվող ավտոմեքենաների մաքսատուրքի բարձրացումը հետաձգելու վերաբերյալ բանակցությունների առնչությամբ՝ հարցին այսօր ՊԵԿ ղեկավար Դավիթ Անանյանը պատասխանեց, որ դեռեւս քննարկումներ են տեղի ունենում:
Հիշեցնենք,որ ԵԱՏՄ կարգավորումներով, 2020 թ.-ից հետո երրորդ երկրներից ներմուծվող մեքենաների մաքսատուրքն էականորեն բարձրանալու է, ինչը հարուցել է մեր քաղաքացիների դժգոհությունը: Այս պահին Հայաստանը բանակցում է այդ ժամկետը հետաձգելու շուրջ:
«Նման քննարկումներ գնում են: Մենք, երբ դարձանք ԵԱՏՄ անդամ, շուրջ 800 ապրանքների բացառում ենք արել, որոնք սպառվելու են: Մեքենաների հերթը հասել է 2020 թվականին: Մենք նախապես բանակցեցինք, 5 տարով հետաձգեցինք: Կա կառավարությունում տրամադրվածություն, որ նորից բանակցենք հետաձգելու համար, բայց ես չգիտեմ՝ դա հաջողությամբ կպսակվի՞, թե՞ ոչ»,-ասաց պարոն Անանյանը: Նրանից հետաքրքրվել էին՝ եթե ժամկետները չհետաձգեն եւ բարձր մաքսատուրք կիրառվի, հնարավո՞ր է, որ գոնե հարկերը նվազեցվեն, որպեսզի քաղաքացիները շատ վնասներ չկրեն, պարոն Անանյանն ասաց, որ իրենք չեն այդ հարցի հասցեատերը եւ, որ ՊԵԿ վարչարարություն իրականացնող մարմին է:
Կարդացեք նաև
Լուսինե ԲՈՒԴԱՂՅԱՆ
