Այսօր ՊԵԿ նախագահ Դավիթ Անանյանը հիշեցնելով վարչապետ Նիկոլ Փաշինյանի՝ մայիսի 8-ին մամուլի ասուլիսի ժամանակ 100 կետի շրջանակում հնչած հարկային եկամուտների ցուցանիշի 63 միլիարդ դրամի գերակատարման մասին հայտարարությունն, ասաց, որ այդ մասով որեւէ մտավախություն չեն տեսնում. «Մենք պետք է ուղղակի արձանագրենք, որ տարվա համար մեր կողմից նախապես կանխատեսված գերակատարումը կատարվել է կիսամյակով: Սա չի նշանակում, որ երրորդ կամ չորրորդ եռամսյակում մենք աննախադեպ գերակատարման այս տենդենցը պետք է պահենք: Եթե ունենայինք սահմանված ճիշտ համամասնություն, ապա առաջին կիսամյակում մենք կունենայինք 23 միլիարդ գերակատարում, երրորդ եռամսյակում՝ 15 միլիարդ գերակատարում եւ չորրորդ եռամսյակում կունենայինք 25 միլիարդ գերակատարում: Ընդհանուր հանրագումարայինը կլիներ շուրջ 63 միլիարդ գերակատարում»:
Դավիթ Անանյանը ներկայացրեց առաջին կիսամյակում հարկային եկամուտների ցուցանիշները:
Ըստ ՊԵԿ ղեկավարի՝ հարկային եկամուտները պլանավորվում են ՀՆԱ-ի հիման վրա, այսինքն՝ նախապես կատարվում է ՀՆԱ-ի կանխատեսում. «ՀՆԱ-ի որոշակի տոկոսը պետք է վերաբաշխվի հարկերի տեսքով: 2018 թ. համար ՀՆԱ պլանավորվել է 6 տրիլիոն 680 մլրդ դրամ, որի 21 տոկոսը պլանավորվել է, որ հարկեր-ՀՆԱ հարաբերակցությամբ պետք է վերաբաշխվի, հետեւաբար ծրագրային նախնական ցուցանիշը 1 տրիլիոն 403 միլիարդ-ը 6 տրիլիոն 680 միլիարդ-ի 21 տոկոսն է: Մենք ասում ենք՝ 63 միլիարդ-ի մասով չունենք որեւէ մտավախություն, եթե բնականաբար տնտեսության զարգացմամբ ապահովվի ՀՆԱ-ի ի սկզբանե ծրագրավորված ծավալները:
«Այսինքն՝ տնտեսության աճի առումով մենք էական խնդիր չենք տեսնում, այսինքն՝ տնտեսությունն իր բնականոն աճով ապահովելու է 6 տրիլիոն 680 մլրդ դրամը: Եթե տնտեսությունը կապահովի 6 տրիլիոն 680 միլիարդ դրամը կամ դրա շրջանակներում ՀՆԱ արդյունք, ապա նախապես հանրությանը ներկայացված գերակատարման վերաբերյալ կանխատեսումները, ըստ էության, կիրականանան: Մենք շուրջ 63 միլիարդ-ի գերակատարումը կպահպանենք»:
Կարդացեք նաև
Լուսինե ԲՈՒԴԱՂՅԱՆ
