Հայաստանի բնապահպաններն ահազանգում են, որ երկրի ամենամեծ լիճը լուրջ վտանգի տակ է ջրիմուռների և ջրի մակարդակի իջեցման պատճառով, հաղորդում է BBC-ն:
Լրագրողների հետ զրույցում բնապահպաններն ասել են, որ եթե իշխանություններն անհրաժեշտ քայլեր չձեռնարկեն, լիճը կվերածվի ճահճի:
Բնապահպանների խումբը գլխավորում է Հանրային խորհրդի բնապահպանական հարցերով հանձնաժողովի նախագահ Կարինե Դանիելյանը:
Բնապահպանության նախարար Էրիկ Գրիգորյանը ջրիմուռները ծաղկումը դնում է ավելի լայն համատեքստում՝ դա կապելով կլիմայական փոփոխությունների հետ և իրավիճակը համեմատելով Բայկալ լճի և Սև ծովի նմանատիպ վիճակի հետ:
Կարդացեք նաև
Նա, մասնավորապես, ասել է, որ դա «երկու շաբաթից կանցնի», բայց բնապահպանները պնդում են, որ լճի ճահճացման վրա ազդում են տեղական այլ գործոններ:
Սևանը կանաչել էր նաև անցյալ տարի, ինչը ստիպել էր առողջապահության նախարարությանը կոչ անել մարդկանց չլողալ ջրում: Էրիկ Գրիգորյանը նմանատիպ դեպք է հիշեցնում նաև 1964թ-ից, բայց այս տարվա արբանյակային լուսանկարները ցույց են տալիս, որ լճի գրեթե կեսը կանաչած է:
Ջրային ռեսուրսների մասնագետ Քնարիկ Հովհաննիսյանը կանաչումը պայմանավորում է այն հանգամանքով, որ Սևանից չափազանց շատ ջուր է բաց թողնվել ոռոգման նպատակներով, ինչը հանգեցրել է ջրի մակարդակի իջեցմանը:
Նա նաև նշում է, որ Սևանի ափին զբոսաշրջության ծաղկումը կարող է հանգեցնել նրան, որ «կկորցնենք տարածաշրջանում քաղցրահամ ջրի միակ ավազանը»:
Որպես անհապաղ միջոց՝ նա առաջարկում է պարտավորեցնել Սևանի ափի ռեստորաններին և հյուրանոցներին ներդնել կոյաջրեր մաքրող կենսաբանական կայաններ, որը իրավական պահանջ է 2006թ-ից:
«Տարեկան 170 միլիոն խորանարդ մետր իմ համոզմամբ հիմա լիճ չի թափվում գլոբալ տաքացման պատճառով»,- ասում է նա:
Էրիկ Գրիգորյանը հավաստիացնում է, որ այս պահին անցկացվում է տենդեր Սևանի ափը և գետերը մաքրելու համար, որպեսզի «2020-2021թթ. այս ամբողջ տարածքը լիարժեք մաքուր լինի» և ջրի մակարդակը նորից կբարձրանա:
Ջրային կոմիտեի ղեկավար Վարդան Մելքոնյանն էլ լրագրողներին ասել է, որ այս տարի առայժմ զգալիորեն ավելի քիչ ջուր է բաց թողնվել Սևանից:
Մինչդեռ բնապահպանները դեռ կասկածում են, որ կառավարությունը գիտակցում է հարցի հրատապությունը:
«Մենք մոտ երկու ամիսն է՝ նրանց զգուշացնում ենք այս մասին: Բոլոր ծրագրերը կան, բայց մենք շարունակում ենք փչացնել Սևանա լիճը մեր անմիտ գործողություններով»,- ասում է Կարինե Դանիելյանը:
Պատրաստեց՝ Վիկտորյա ԱՆԴՐԵԱՍՅԱՆԸ
