Այսօր մամուլում լուր է հրապարակվել, ըստ որի՝ Հայաստանի կապի 2 օպերատորները՝ «Յուքոմ»-ն ու «Բիլայն»-ը բանակցում են «ՄՏՍ Արմենիա»՝ «ՎիվաՍել»-ի հետ, որպեսզի միաձուլվեն «ՄՏՍ Արմենիային», քանի որ «Յուքոմ»-ն ու «Բիլայն»-ը մրցակցությանը չեն դիմանում: Նույն հրապարակման փոխանցմամբ. «Ռոբերտ Քոչարյանի օրոք բջջային կապի օպերատորի լիցենզիա ստացած «Վիվա Սելը» այնպիսի արտոնություններ է ունեցել, որ կարողացել է գերիշխող դիրքի հասնել բջջային կապի շուկայում, եւ հիմա նրա մրցակիցները չեն կարողանում դիմանալ այդ մրցակցությանը»:
Aravot.am-ն այս առնչությամբ պարզաբանում խնդրեց «Բիլայն»-ից, «Յուքոմ»-ից եւ «Վիվա Սել»-ից:
«Յուքոմ» ընկերության հանրային կապերի պատասխանատու Դիանա Մնացականյանը հերքեց տեղեկությունը, վստահեցնելով՝ իրականությանը չի համապատասխանում, ընկերությունը որեւէ բանակցություն՝ միաձուլման շուրջ, չի վարում:
Aravot.am-ի հետ զրույցում «ՎիվաՍել-ՄՏՍ»-ի հանրային կապերի պատասխանատու Վահե Իսահակյանն էլ ասաց. «Մեզ համար արդեն սովորական է դարձել, երբ հերթական նորարարության մասին հայտարարելուց հետո, շատ «տրամաբանական» կերպով, լրատվական դաշտում հայտնվում են կազմակերպությանը վերագրվող՝ կեղծ ու մտացածին տեղեկություններ: ՎիվաՍել-ՄՏՍ-ը կտրականապես հերքում է որեւիցե այլ օպերատորի հետ միաձուլման տեղեկությունները»:
Կարդացեք նաև
Բացի այս, «ՎիվաՍել-ՄՏՍ»-ից նաեւ տեղեկացրեցին. «Ընկերությունը երբեւիցե, իր հիմնադրման օրվանից առ այսօր, չի օգտվել որեւիցե արտոնությունից»:
«Բիլայն» ընկերությունից Aravot.am-ի հարցին ի պատասխան ասացին. «Անհեթեթ շշուկներին չենք արձագանքում»:
Նելլի ԲԱԲԱՅԱՆ
