Երևանում անցկացվող Հինգերորդ միջազգային բժշկական համաժողովի «Հանրային առողջություն» սեկցիայի ժամանակ ներկայացվեցին ախտորոշիչ որոշումներին աջակցող և արհեստական բանականությամբ գործող համակարգեր, որոնք կոչված են օգնել բժիշկ-թերապևտներին ավելի ճշգրիտ ախտորոշել պացիենտին՝ հենց սկզբից նշանակելով ճիշտ բուժում և հետագայում խուսափել անցանկալի հետևանքներից:
Համակարգերը մշակվել են Հայաստանի «Էլեկտրոնային առողջապահության ազգային օպերատոր» ՓԲ ընկերության հիմնադիր՝ տեղեկատվական տեխնոլոգիաների ոլորտում գործող «Sylex SARL» ընկերության հայ ծրագրավորողների կողմից: Դրանք նախատեսված են բժշկական հանրության համար և համալիր լուծում են առաջարկում սխալ ախտորոշումներից խուսափելու հարցում:
«Մենք իրականում երեք համակցված համակարգ ենք առաջարկում. առաջինը կոչվում է Terra Medicum և հանդիսանում է ինտերակտիվ ախտորոշման սիմուլյատոր առաջնային օղակի մասնագետների համար, ինչը նպատակ ունի զարգացնել այդ մասնագետների հմտությունները: Հաջորդը՝ արհեստական բանականությամբ գործող՝ «Դոկտոր Լեքս» կոչվող ռոբոտ-համակարգն է, որը հանդես է գալու որպես թերապևտ-բժշկի օգնական և աջակցելու է նրան ճիշտ ախտորոշում կայացնելու հարցում: Եվ երրորդը՝ Terra Clinic կոչվող համակարգն է, որն արդյունավետ և օպտիմալ էլեկտրոնային բժշկական քարտերի (EHR) ներդրման լուծումներ է առաջարկում՝ հիմնվելով HL7 FHIR միջազգային ստանդարտների վրա: Այս համակարգերի նպատակն է նվազեցնել հնարավոր սխալ ախտորոշումների դեպքերը և ի սկզբանե պացիենտին տանել ճիշտ բուժման»,-պարզաբանում է «Sylex SARL» ընկերության զարգացման գծով տնօրեն Կարեն Բադալյանը։
Նա նշում է, որ համակարգերը ներկայումս թեստավորման փուլում են, կան պայմանավորվածություններ աշխարհի մի շարք առաջատար կլինիկաների հետ դրանք փորձարկելու վերաբերյալ:
Կարդացեք նաև
«Այս խելացի համակարգերն իսկապես զգալիորեն կարող են հեշտացնել բժիշկների գործը և խնայել նրանց ժամանակը, ինչի հաշվին նրանք կարող են ավելի շատ պացիենտների սպասարկել և, ամենակարևորը, կայացնել ճիշտ ախտորոշում: Մեր ընկերությունը մասնագիտացել է բժշկության և էլեկտրոնային առողջապահության ոլորտում ծրագրային ապահովումների մշակման մեջ: Մենք քաջատեղյակ ենք առողջապահության ոլորտի խնդիրներին և դրանց փորձում ենք լուծում տալ տեղեկատվական տեխնոլոգիաների միջոցով՝ կիրառելով արհեստական բանականություն և խելացի այլ լուծումներ: Ակնհայտ է, որ ՏՏ շատ մեծ կիրառություն ունեն առողջապահության մեջ և զգալիորեն փոխում են դրա որակը: Ուստի մենք կարևոր համարեցին այն ներկայացնել նաև այս համաժողովի մասնակիցներին, որոնց կողմից հետաքրքրությունը բավականին մեծ էր»,-ասում է Կարեն Բադալյանը:
Ընկերության ծրագրավորողների կողմից համակարգերի մշակման համար մեծ ծավալի աշխատանք է կատարվել։ Դրանցում ներգրավվել են նաև բժիշկներ, օգտագործվել են հայտնի Merck կազմակերպության բժշկական հանրագիտարանները, PubMed-ի տեղեկատվական բազաները։
«Դոկտոր Լեքս» կոչվող ռոբոտ-համակարգը այս տարվա փետրվարին ներկայացվել է ԱՄՆ-ում կայացած HIMSS19 Health IT Conference (առողջապահության ոլորտի տեղեկատվական տեխնոլոգիաներ) խոշորագույն միջազգային համաժողովին, որտեղ համաշխարհային առաջատար ընկերությունները ցուցադրում են առողջապահության ոլորտին վերաբերող տեխնոլոգիական նորությունները։
Տեղեկանք Տեղեկատվական տեխնոլգիաների ոլորտում գործող «Sylex SARL» ընկերությունը, «Մեյսիս Ապահով» ընկերության հետ հանդիսանում է Հայաստանի «Էլեկտրոնային առողջապահության ազգային օպերատոր» ՓԲ ընկերության հիմնադիրը։ «Sylex SARL» –ը մասնագիտացած է էլեկտրոնային առողջապահության և ապահովագրության ոլորտներում ծրագրային լուծումների մշակումների մեջ։ Այս ոլորտներում ընկերությունը նշանակալի միջազգային փորձ ունի։ «Sylex SARL» –ը համարվում է համաշխարհային տեխնոլոգիական առաջատար «Ericsson Nikola Tesla» ընկերության գլոբալ գործընկերը։
«Էլեկտրոնային առողջապահության ազգային օպերատոր» ՓԲ ընկերություն
