ՀՀ ԱԺ ֆինանսավարկային եւ բյուջետային հարցերի մշտական հանձնաժողովի hաշվեքննության եւ աուդիտի հարցերի ենթահանձնաժողովը Տիգրան Ուլիխանյանի նախագահությամբ հուլիսի 4-ին հրավիրած նիստում քննարկել է կենսաթոշակային ոլորտին առնչվող մի շարք հարցեր:
Մասնակցել են ԱԺ պատգամավորներ, ՀՀ աշխատանքի եւ սոցիալական հարցերի փոխնախարարներ, ՀՀ հաշվեքննիչ պալատի անդամներ, փորձագետներ:
ՀՀ հաշվեքննիչ պալատն իրականացրել է հաշվեքննություն ՀՀ աշխատանքի եւ սոցիալական հարցերի նախարարության 2017-2018թթ. պետական բյուջեի միջոցների օգտագործման վերաբերյալ:
Կենսաթոշակների վճարման հասցեականության համակարգում հայտնաբերվել են բազմաթիվ անճշտություններ ու թերություններ: Վճարված շուրջ 194 միլիարդ դրամ կենսաթոշակի 80 տոկոսն իրականացվել է կանխիկ եղանակով: Մոտ 617 միլիոն դրամ գումար է տրամադրվել անձանց, ովքեր բացակայել են հանրապետությունից. երկրից 3- 9 ամիս բացակայող քաղաքացիներին տրվել է շուրջ 4միլիարդ դրամ: Խնդիրներ են արձանագրվել լիազորագրով թոշակ ստացողների շրջանում:
Կարդացեք նաև
ՀՀ աշխատանքի եւ սոցիալական հարցերի նախարարի տեղակալ Սմբատ Սաիյանը նշել է, որ ստեղծվել է աշխատանքային խումբ, քարտեզագրվել են խնդիրները եւ մոտ ապագայում կտրվեն դրանց լուծումներ:
Փոխնախարարը, կարեւորելով թոշակների անկանխիկ վճարման կարգը, նկատել է, որ թոշակառուներից շատերը դեմ են դրան:
Ենթահանձնաժողովի նախագահը կարեւոր է համարել խնդիրներին համակարգային եւ իրավական լուծումներ տալը:
ՀՀ աշխատանքի եւ սոցիալական հարցերի փոխնախարար Ժաննա Անդրեասյանը խոսել է տեղեկատվական բազաների խնդիրներից: Ըստ նրա՝ շրջանառության մեջ է դրվել օրենսդրական նախաձեռնություն, որով փորձ է արվելու նպաստների բազմաբաղադրիչ համակարգը հստակեցնել՝ դարձնելով պարզ ու թափանցիկ:
Պատգամավոր Արթուր Գրիգորյանը ոլորտի խնդիրները լուծելու գործում կարեւորել է սոցիալական աշխատողի ինստիտուտի ներդրումը:
Տիգրան Ուլիխանյանը տեղեկացրել է, որ այսօրինակ բազմակողմ քննարկումները լինելու են շարունակական:
ՀՀ Ազգային ժողով
