Տնտեսագետ Վահագն Խաչատրյանը կարծում է, որ ՀՀ-ում նվազագույն աշխատավարձի բարձրացման դեպքում ստացված գումարը գրեթե հավասարեցվում է միջին աշխատավարձի չափին: «Սա ողջունելի մոտեցում է, հուսամ՝ կառավարությունն այսպես կշարունակի»,-«Հոդված 3» մամուլի ակումբում լրագրողների հետ հանդիպմանն այսօր ասաց նա:
Հիշեցնենք, որ 2020թ.-ի հունվարից ՀՀ-ում նվազագույն աշխատավարձը 55 հազար դրամից նախատեսվում է դարձնել 68.000 դրամ:
Վահագն Խաչատրյանը շեշտեց, որ աշխատավարձի դերը տնտեսական կյանքում նախկինում վերացած էր. «Կապիտալի բեւեռացումը եւ սոցիալական անարդարությունը տեղի են ունեցել նաեւ այդ հետեւանքով»:
Ըստ տնտեսագետի՝ ներկայումս շահարկվում է հարցը, թե նվազագույն աշխատավարձի բարձրացումը պետբյուջեի վրա ինչ բեռ է ավելացնելու. «Գտնում եմ, որ հիմա պետք է օգտագործենք այս հնարավորությունը՝ տնտեսությունում աշխուժություն մտցնելու համար: Սա այն հնարավորություններից է, որի դեպքում պետությունն իր լծակներն է օգտագործում: Երբ նվազագույն թոշակը բարձրացվեց, պարզվեց, որ կարող էին դա անել, բայց չէին անում: Նույնն էլ այս դեպքում է: Պարզվում է, որ միջոցներ կան նվազագույն աշխատավարձ բարձրացնելու»:
Կարդացեք նաև
Վահագն Խաչատրյանը համոզված է, որ նվազագույն աշխատավարձի բարձրացումը տնտեսության վրա դրական է ազդելու:
Լուիզա ՍՈՒՔԻԱՍՅԱՆ
