Այսօր արդարադատության նախկին նախարար Դավիթ Հարությունյանը լրագրողների հետ զրուցում խոսելով վեթթինգի մասին՝ ասաց. «Վեթթինգի նախադրյալներ չկան Հայաստանում: Գործիքները, որոնք առկա են, թույլ են տալիս բացահայտել ոչ իրավաչափ ճանապարհով ստացված գույքը, բացահայտել եւ քայլեր ձեռնարկել, ընդ որում, եթե որեւէ մեկը ջանք գործադրի ու բացի «Դատական օրենսգրքի» այն դրույթները, որոնք վերաբերում են դատավորի կողմից գույքի հայտարարագրմանը, նվերներ ընդունելուն եւ այլն, կբացահայտի, թե ինչպիսի կոշտ կարգավորումներ ենք մենք ուժի մեջ մտցրել 2018-ին: Ես չեմ պատկերացնում, որ որեւէ մեկը հիմա կկարողանա առաջարկել ավելի խորը մեխանիզմներ, ուղղակի այդ մեխանիզմները պետք է գործեն»:
Հարցին՝ Նիկոլ Փաշինյանը կոչ արեց շրջափակել դատարանները, այստեղ սահմանադրական կարգի տապալում տեսնո՞ւմ եք՝ Դավիթ Հարությունյանը պատասխանեց. «Դա նուրբ իրավական կատեգորիա է: Այն, որ քաղաքական առումով անթույլատրելի քայլ էր, որ սա ճնշում էր դատարանների վրա՝ միանշանակ, հուսամ, որ նմանատիպ երեւույթներ մեզանում այլեւս չեն լինի, որովհետեւ յուրաքանչյուր նման երեւույթ անդառնալի հետք է թողնում երկրի վրա: Վտանգավոր քայլ ենք անում: Ցանկացած վտանգավոր քայլի վտանգը նրանում է, որ կգտնվի մի օր մեկը, հաջորդ իշխանությունները, որը կարող է դրա վրա ավելացնել հաջորդը: Երբ դու սկսում ես պլանկա իջեցնել, միշտ հնարավորություն կա, որ ինքն ավելի իջնի: Եթե որեւէ մեկը մտահոգ է մեր պետականության զարգացման պահպանման, ամրապնդման հարցերում, նա պետք է դեմ լինի նման մոտեցումներին: Ցավում եմ, որ որեւէ մեկը վարչապետի շրջապատում չգտնվեց, որ նրան ասի՝ այս քայլից եկեք ձեռնպահ մնանք»:
Հռիփսիմե ՋԵԲԵՋՅԱՆ
