«Սեւանա լճի փոխարեն շուտով կարող ենք ճահիճ ունենալ: Այս մասին տարիներ շարունակ ասում էինք, մեզ ծաղրում էին, բայց այսօր մոտեցել ենք այդ կետին: Ցավոք»,-«Էկոլուր» մամուլի ակումբում փորձագետների հավաքի ժամանակ այսօր անդրադառնալով Սեւանա լճի ծաղկման ու ջրում թունավոր նյութերի կուտակման խնդրին, ասաց բնապահպան, ՄԱԿ-ի ազգային փորձագետ Կարինե Դանիելյանը: Նա նշեց, որ դեռեւս 1964թ.-ից Սեւանը ծաղկել է, բայց կարճ ժամանակահատվածով. «Ներկայիս վիճակը երբեւէ չի եղել: Սա խոսում է ճահճացման լուրջ վտանգի մասին»:
Կարինե Դանիելյանը տեղեկացրեց, որ փորձագետներով կառավարությանն առաջարկում են գոնե այս տարի Սեւանից լրացուցիչ ջրառ չանել, քանի որ լիճն արձագանքում է դրան. «Ջուրը բարձրացնելու դեպքում ինքնամաքրման ներուժը մեծանում է, իսկ մակարդակի իջեցման դեպքում բացասական արդյունք է ստացվում: Մենք առաջարկում ենք զբաղվել նաեւ ոռոգման ցանցի կորուստներով, որովհետեւ Սեւանից ջուր վերցնելիս մեծ կորուստներ են գրանցվում: Ջրային կոմիտեն աշխատանք անում է, բայց ոչ այն ծավալով, որը պահանջում է Սեւանը»:
Կարինե Դանիելյանը հավելեց, որ կառավարությունից պահանջում են շտապ ստեղծել անկախ փորձագետների մասնագիտական հանձնաժողով. «Բոլոր ծրագրերը կան, բայց լճի վիճակը խիստ վատացել է, ուստի լրացուցիչ միջոցառումներ են պետք: Քիմիկոսներն ասում են, որ որոշակի նյութերով կարելի է վերջ տալ ջրում ծաղկած ջրիմուռներին, դա պետք է դիտարկել ու ուսումնասիրել»:
Այլ մանրամասները՝ տեսանյութում
Կարդացեք նաև
https://www.facebook.com/aravot.am/videos/490741241730384/
Լուիզա ՍՈՒՔԻԱՍՅԱՆ
