Վարչապետի որոշմամբ Սփյուռքի գործերի գլխավոր հանձնակատար նշանակված Զարեհ Սինանյանն այսօր լրագրողների հարցին՝ սփյուռքում այնքան էլ միանշանակ չեն ընդունել ձեր նշանակումը, ինչպե՞ս կարձագանքեք, պատասխանեց, որ չգիտի, տեղյակ չի՝ այդ ի՞նչ աղմուկ է. «Սոցիալական ցանցերում էնքան բաներ են ասում, կոնկրետ ասեք ինչ են ասում՝ պատասխանեմ: Ես 13 տարի հասարակական գործունեությամբ եմ զբաղվել, 6,5 տարի էլ քաղաքական գործիչ եմ եղել՝ ընտրված, ո՞նց կարող է բոլորը ինձ սիրեն ու բոլորը ինձ համաձայնեն: Կարող են լինել անհատներ, Աստված իրենց հետ, ժողովրդավարական երկիր է, մարդիկ իրենց կարծիքն ունենալու իրավունքն ունեն»:
Սինանյանը խոսեց գրասենյակի կառուցվածքի, բյուջեի մասին: Հարցին՝ վարչապետը ի՞նչ խնդիր է դրել ձեր առջեւ, նա պատասխանեց. «Գլխավոր խնդիրը սփյուռքի հետ հարաբերությունների բարելավումն ու ամրապնդումն է»: Թե ո՞րն է համարում ամենացավոտ խնդիրը, որ կա Հայաստան-սփյուռք հարաբերություններում, Սինանյանը պատասխանեց. «Շատ ցավոտ խնդիր չկա, այս պահին մենք դեռ վերականգնում ենք վստահությունը Հայաստան պետության նկատմամբ, այդ վստահության պակասը առաջացել էր նախորդ իշխանության վարած շատ ցավալի քաղաքականության արդյունքում՝ ոչ միայն սփյուռքի, այլ ամբողջ հայ ժողովրդի նկատմամբ»:
Լրագրողները հետաքրքրվեցին՝ ձեզ ի՞նչը գրավեց, որ ԱՄՆ-ի նման երկիրը թողեք ու գաք Հայաստան, նա պատասխանեց. «Հայրենիքը գրավեց ինձ, Հայրենիքում աշխատելու եւ դրական փոփոխության մեջ դեր խաղալու հնարավորությունը»:
Հարցին՝ վարչապետի առաջարկը սպասելի՞ էր, նա պատասխանեց, որ ոչ այնքան, բայց տրամաբանական է համարում. «Ինչո՞ւ՝ ոչ: Փաստորեն հա՛մ Հայաստան եմ, հա՛մ սփյուռք եմ միաժամանակ, աշխատանքով պետք է ապացուցեմ, որ դա լավ ընտրություն էր, հաստատ գիտեմ, որ կարող եմ լավ աշխատել եւ հույս ունեմ, որ աշխատանքս կունենա ցանկալի արդյունքները»:
Կարդացեք նաև
Հռիփսիմե ՋԵԲԵՋՅԱՆ
