«Տպավորություն է, թե մի ամբողջ հավերժություն մնաց հետեւում, դեռեւս չեմ կարողանում համակերպվել 60 թվի հետ, ինձ թվում է, որ ոչ թե 60 տարեկան եմ, այլ ավելի երիտասարդ եմ: Միակ հուսադրող բանն այն է, որ ում հրավիրում եմ իմ 60-ամյակին, չի հավատում, որ 60 եմ»,- Aravot.am-ի հետ զրույցում ասաց ռեժիսոր, Հայաստանի թատերական գործիչների միության նախագահ Հակոբ Ղազանչյանը՝ խոսելով իր հոբելյանի մասին:
Ասաց, որ արդեն սկսել է եզրահանգումներ անել, մի քիչ ավելի ուշադիր է իր հանդեպ, այլեւս ավելորդ մարդկանց չի թողնում իր կյանք, չի ներում դավաճանությունը:
«Հիշում եմ, երբ ֆիլմ էի նկարում Արմեն Ջիգարխանյանի մասին մի տասնհինգ տարի առաջ, ասաց՝ ես արդեն սկսել եմ ամեն մեկին թույլ չտալ, որ մտնեն իմ կյանք, նաեւ նորմալ եմ վերաբերվում, որ ես չհայտնվեմ իրենց կյանքում: Նույնը նաեւ իմ պարագայում է: Բայց նաեւ ուզում եմ ասել, որ բացարձակ չեմ մտածում տարիքի մասին, ծրագրեր շատ կան; Հենց հիմա աշխատում եմ պիեսի վրա, ինստիտուտում կուրս եմ հավաքում, քննությունների եմ… Այնպես որ՝ կյանքը շարունակվում է, թող առողջություն լինի, հարազատներս առողջ լինեն, հայրս առողջ լինի, մնացածը ինչ-որ ձեւով կհաղթահարենք»,-ասաց արվեստագետը:
Կարդացեք նաև
Հավելենք, որ Հակոբ Ղազանչյանի ծննդյան օրը շնորհավորելու էին եկել ոչ միայն գործընկերները, մշակույթի, հասարակական եւ այլ ոլորտների մարդիկ, ներկա եւ նախկին պաշտոնյաներ, այլեւ Հայաստանում ԵՄ պատվիրակության ղեկավար, դեսպան Պյոտր Սվիտալսկին :
Գոհար ՀԱԿՈԲՅԱՆ
