Պետականության զարգացում, անվտանգության ապահովում, ՀՀ ազգաբնակչության բարեկեցություն. քաղաքագետ Արմեն Մինասյանի կարծիքով, սրանք Հայաստանի շահերն են, ինչը մեր կառավարիչները պետք է հստակ պատկերացնեն: Այս մասին քաղաքագետն ասաց «Ոսկանապատ» վերլուծական կենտրոնի այսօր կազմակերպած
«Վրաստան-Հայաստան. ինչպե՞ս արձագանքել ռուս-վրացական լարվածությանը» թեմայով քննարկման ժամանակ:
Քաղաքագետը գտնում է, որ ամեն ինչ պետք է ծառայեցնենք այս երեք խնդիրների լուծմանը: Ինչ վերաբերում է հայ-վրացական հարաբերություններին, Արմեն Մինասյանը կարեւոր է համարում տարբերակել փաստերը եւ պտտվող տեղեկությունները: Նա նաեւ վստահ է, որ վրացական խորհրդարանում տեղի ունեցածը Վրաստանի փողոցվում տեղի ունեցածի հետ շատ քիչ կապ ունի:
Արմեն Մինասյանը նաեւ կարծում է, որ տեղի ունեցող զարգացումներում միշտ չէ, որ քաղաքական կամ աշխարհաքաղաքական համատեքստեր պետք է տեսնել: Այս առնչությամբ նա անդրադարձավ նաեւ ռուս զբոսաշրջիկների՝ Վրաստան ներհոսքի խնդրին՝ նկատելով, որ ՌԴ-ն խնդիր ունի սեփական զբոսաշրջիկներով համալրելու Ղրիմը, ուստի, եթե չլիներ որեւէ քաղաքական գործոն, ամենը կարելի էր դիտարկել տուրիստական հոսքերը Ղրիմ ուղղորդելու տեսանկյունից։ Արմեն Մինասյանը հիշեցնում է ձմեռային զբոսաշրջային շրջանը, երբ ռուսական լրատվամիջոցները տեղեկություններ տարածեցին`Վրաստանում գրիպի համաճարակի մասին, ինչի արդյունքում, ռուս զբոսաշրջիկների մեծ մասն իր հանգիստը Սոչիում անցկացրեց:
Արմեն Մինասյանի կարծիքով, ի դեպ, Հայաստանը պետք է, այսպես ասած, առիթն օգտագործի եւ փորձի ռուս զբոսաշրջիկներին Հայաստան բերել:
Կարդացեք նաև
Ամեն դեպքում, ըստ բանախոսի, բավական դինամիկ քաղաքական գործընթացների կիզակետում ենք գտնվում, որոնց զարգացումները մի քանի շերտերով պետք է դիտարկենք` աշխարհաքաղաքական, տարածաշրջանային եւ տվյալ երկրների ներքաղաքական զարգացումների: Նա առաջարկում է Վրաստանի թուրք-ադրբեջանական համագործակցություններին չնայել իբրեւ Հայաստանի դեմ ուղղված գործարքներ, այնպես, ինչպես ՀՀ-ում ՌԴ ռազմաբազան չպետք է ընկալվի Վրաստանի դեմ գործիք:
Մանրամասները` տեսանյութում
Նելլի ԳՐԻԳՈՐՅԱՆ
