ՀՀ վարչապետ Նիկոլ Փաշինյանը այսօր տեղեկացրեց, որ ՀՀ Սահմանադրության օրվա կապակցությամբ որոշում է կայացրել մասնավորապես զինվորական կոչումներ շնորհելու մասին:
Մինչդեռ Սահմանադրության հոդված 133-ի համաձայն՝ «Հանրապետության նախագահը, վարչապետի առաջարկությամբ, օրենքով սահմանված դեպքերում եւ կարգով շնորհում է բարձրագույն զինվորական կոչումներ»:
Նիկոլ Փաշինյանը հայտարարել է նաեւ դասային աստիճաններ շնորհելու մասին, մինչդեռ սա նույնպես ՀՀ նախագահի լիազորությունն է: Սահմանադրության հոդված 137-ի համաձայն՝ «Հանրապետության նախագահն օրենքով սահմանված դեպքերում և կարգով շնորհում է բարձրագույն դասային աստիճաններ»:
Իհարկե, Նիկոլ Փաշինյանը նաեւ հայտնել է. «Որոշումներն ուժ մեջ կմտնեն Հանրապետության նախագահի կողմից համապատասխան հրամանագրերը ստորագրելուց հետո»:
Կարդացեք նաև
«ՀՀ պետական պարգեւների եւ պատվավոր կոչումների մասին» օրենքի հոդված 5.3.-ի համաձայն էլ սահմանվում է Հայաստանի Հանրապետության պետական պարգևներով պարգևատրելու և պատվավոր կոչումներ շնորհելու կարգը. «Հայաստանի Հանրապետության պետական պարգևներով պարգևատրում և պատվավոր կոչումներ շնորհում է Հանրապետության նախագահը` համապատասխան միջնորդության հիման վրա:
2. Հանրապետության նախագահը Հայաստանի Հանրապետության պետական պարգևներով պարգևատրում և պատվավոր կոչումներ շնորհում է հրամանագրի ընդունմամբ:
3. Հայաստանի Հանրապետության պետական պարգևով պարգևատրելու և պատվավոր կոչումներ շնորհելու վերաբերյալ միջնորդությունն ստանալուց հետո` եռօրյա ժամկետում, Հանրապետության նախագահը կարող է պետական պարգևով պարգևատրելու կամ պատվավոր կոչում շնորհելու վերաբերյալ Հանրապետության նախագահի հրամանագրի նախագիծն իր առարկություններով վերադարձնել միջնորդությամբ դիմող մարմին»:
Վարչապետն իրավասու է միջնորդությամբ դիմելու Հանրապետության նախագահին Հայաստանի Հանրապետության բոլոր պետական պարգևների և պատվավոր կոչումների վերաբերյալ: Սակայն Նիկոլ Փաշինյանը արդեն իսկ հայտարարել է կայացված որոշման մասին:
«Առավոտի» խնդրանքով անդրադառնալով մինչ ՀՀ նախագահի հրամանագրերն արդեն իսկ ազդարարված այս որոշումներին՝ ՀՀ վարչապետի խոսնակ Վլադիմիր Կարապետյանն ասաց. «Վարչապետը կայացրել է որոշում: Այն ի կատար է ածվելու համաձայն Սահմանադրության եւ օրենքների»:
Աննա ԻՍՐԱՅԵԼՅԱՆ
