Ինչպես արդեն տեղեկացրել ենք, Երևանի ընդհանուր իրավասության դատարանում հուլիսի 2-ին ընթացավ նախկին փոխոստիկանապետ Լևոն Երանոսյանի գործով դատական նիստը (նախագահող դատավոր Հարություն Մանուկյան):
Նախագահող դատավորը գործով տուժող ճանաչեց ՀՀ ԱԺ փոխնախագահ Ալեն Սիմոնյանին և պատգամավոր Արեն Մկրտչյանին: Դատական նիստին ներկա էր նաև Լևոն Երանոսյանը, նիստին չէին մասնակցում տուժողի ներկայացուցիչները:
Հիշեցնենք՝ Լևոն Երանոսյանը մեղադրվում է 2018-ի ապրիլի 16-ին և 22-ին Երևանում 8 հատ «Զարյա» տեսակի լուսաձայնային նռնակներ կիրառելու և այդպիսով իր լիազորությունների շրջանակից դուրս գործողություններ կատարելու մեջ:
Սակայն նա չի ընդունում իր մեղադրանքը:
Կարդացեք նաև
Դատական նիստի ավարտից հետո լրագրողները Լևոն Երանոսյանին հարցեր հղեցին գործի հետ կապված, սակայն նա հայտարարեց. «Պաշտպանիս հետ խոսեք, ես մի բառ չեմ փոխանակելու: Ժամանակը կգա, կխոսեմ»:
Հարցին՝ իսկ Դուք ինչո՞ւ չեք խոսում, ո՞ւմ հրամանն էր հատուկ միջոց կիրառել, որ բերման ենթարկեին Նիկոլ Փաշինյանին, Լևոն Երանոսյանը պատասխանեց. «Կգա ժամանակը, կխոսեմ: Չեմ խուսափում, կգա ժամանակը կխոսեմ»:
Տաթև ՀԱՐՈՒԹՅՈՒՆՅԱՆ
