Հոնկոնգում ոստիկաններն արցունքաբեր գազ են կիրառել և ցուցարարներին դուրս հանել օրենսդիր մարմնի շենքից: Արտահանձնման մասին վիճելի օրենքի դեմ պայքարող ակտիվիստները խորհրդարանի շենքում մնացել են մի քանի ժամ՝ կոտրելով մուտքի ապակե դռները, հաղորդում է BBC-ն:
Շենքի գրոհը սկսվել է կեսգիշերին: Ցուցարարների մեծ մասն ազատել են խորհրդարանի նիստերը դահլիճը, երբ իմացել են, որ ոստիկանությունը մոտենում է: Նրանց մի մասին ընկերներն ուժով դուրս են հանել:
Գրոհը սկսելուց մոտ մեկ ժամ անց շենքը և հարակից փողոցներն ազատվել են ցուցարարներից: Ձերբակալվածների մասին չի հաղորդվում:
Երկուշաբթի արտահանձնման մասին օրենքում փոփոխություններ կատարելու դեմ բողոքող ցուցարարները ներխուժել էին Հոնկոնգի խորհրդարանի շենք՝ մետաղական սայլակով կոտրելով շենքի ապակե դռները:
Ճանապարհային նշաններով և մետաղական խողովակներով զինված ցուցարարները մեծ հոսքով մտել էին խորհրդարան և սկսել պատերից պոկել նկարները և կոտրել դռները:
Չնայած կառավարությունն արդեն համաձայնել է անժամկետ հետաձգել արտահանձնման մասին օրենքի քննարկումը, բայց ցույցերը շարունակվում են: Ցուցարարները պահանջում են վերջնականապես հրաժարվել վիճելի օրինագծի ընդունումից: Ցուցարարների մեկ այլ պահանջ է Հոնկոնգի ղեկավար Քերի Լեմի հրաժարականը:
Ինքը՝ Լեմը, արտահերթ մամուլի ասուլիսում ցուցարարներին մեղադրել է «բռնության գերազանցման մեջ»: Նա նաև ասել է, որ նրանց գործողությունները ցավ են պատճառում բազմաթիվ մարդկանց, քանի որ նրա խոսքով Հոնկոնգում օրենքի գերակայությունից բարձր այլ բան չկա:
Նրա հետ չի համաձայնել դեմոկրատ քաղաքական գործիչ Ֆերնանդո Չենը. նա կարծում է, որ ոստիկանությունը դիտավորյալ է ցուցարարներին թույլ տվել ներխուժել խորհրդարան, որպեսզի հետո նրանց ներկայացնեն վատ լույսի ներքո:
Պատրաստեց՝ Վիկտորյա ԱՆԴՐԵԱՍՅԱՆԸ
