«ԲՀԿ-ի քաղաքական որոշումն է եղել Եվրոպայի խորհրդի խորհրդարանական վեհաժողովում «կողմ» քվեարկել Ռուսաստանի պատվիրակության իրավունքների վերականգնման օգտին»,-լրագրողների հետ հանդիպմանն այսօր հայտարարեց ԵԽԽՎ-ում հայաստանյան պատվիրակության անդամ, ԲՀԿ պատգամավոր Նաիրա Զոհրաբյանը՝ անդրադառնալով ԵԽԽՎ վերջին նստաշրջանում Ռուսաստանի վերադարձի վերաբերյալ քվեարկությանը:
Ինչ վերաբերում է հայաստանյան պատվիրակ, «Իմ քայլը» խմբակցության պատգամավոր Ռուբեն Ռուբինյանի՝ «դեմ» քվեարկելուն, Նաիրա Զոհրաբյանը վստահեցրեց, որ դա եղել է տեխնիկական վրիպակ. «Ես ինքս դահլիճում եմ եղել այդ ժամանակ»:
Լրագրողը հետաքրքրվեց՝ «Ռուբեն Ռուբինյանն ասել էր, որ սխալից հետո ռուս գործընկերների հետ «մերձեցման երեկո» պետք է կազմակերպվի, կազմակերպվե՞ց»: Նաիրա Զոհրաբյանը պատասխանեց. «Ես «մերձեցման երեկո»-ի կամ «ցերեկո»-ի չեմ մասնակցել»:
Հայկական պատվիրակության անդամ, «Իմ քայլը» խմբակցության պատգամավոր Հովհաննես Իգիթյանն էլ նշեց. «Չգիտեմ՝ նման երեկո եղե՞լ է, թե ոչ: Եթե լիներ, մասնակցելու խնդիր չեմ տեսնում»:
Կարդացեք նաև
Հայ պատվիրակները նշեցին, որ ԵԽԽՎ-ում իրենց ռուս գործընկերներին բացատրել են, որ տեխնիկական վրիպակ է եղել: «Պաշտոնական հանդիպում նրանց հետ չի եղել, եղել են գործընկերային հանդիպումներ: Խնջույք կամ նման բան չի եղել»,-հայտնեց մեկ այլ հայ պատվիրակ, «Իմ քայլի» պատգամավոր Վլադիմիր Վարդանյանը:
Հավելենք, որ Ռուբեն Ռուբինյանն ասուլիսին չէր մասնակցում՝ գործուղման էր:
Լուիզա ՍՈՒՔԻԱՍՅԱՆ
