«Ինչպես հայտնի է, ԼՀԿ-ն ցանկանում էր առաջադրել իր թեկնածուին, եւ բանակցություններ էին ընթանում մեծամասնության՝ «Իմ քայլի» հետ: Մենք մեծամասնության առաջին երկու թեկնածուներին վերապահումներով «կողմ» քվեարկեցինք՝ ստեղծելով գործընկերային մթնոլորտ, որպեսզի շարունակենք բանակցությունները եւ հասնենք դրական հանգրվանի»,-ԱԺ ամբիոնից այսօր «Իմ քայլը» խմբակցության կողմից ՀՀ Բարձրագույն դատական խորհրդի անդամի թեկնածու առաջադրված իրավաբան Աննա Մարգարյանի թեկնածության հարցի քննարկման ժամանակ հայտարարեց «Լուսավոր Հայաստան» խմբակցության պատգամավոր Գեւորգ Գորգիսյանը:
«Ցավոք, մեր երկու թեկնածուները մերժվել են մեծամասնության կողմից՝ որոշ դեպքերում թեթեւակի, մյուս դեպքում՝ առանց մեկնաբանության: Մենք հիմա խնդրի առաջ ենք: Հին ավանդույթներով՝ միայն մեծամասնությունը կարող է թեկնածուների առաջադրել: Այդ ավանդույթները շարունակվում են եւ խնդիր ստեղծում անկախ մարմինների համար, որոնցում, փաստորեն, այլեւս չեն ներկայացվում քաղաքական բազմազանությունը ներկայացնող անձինք»,-արձանագրեց Գեւորգ Գորգիսյանը:
Նրա խոսքով. «Այսպես խմբակցությունների կողմից անկախ մարմիններում թեկնածուներ առաջադրելու իրավունքը դառնում է պատրանքային, որովհետեւ չի կարողանում կյանքի կոչվել: Ելնելով մեծամասնության այլ գործելաոճից եւ բանակցությունները տապալելու այս քայլերից՝ ԼՀԿ-ն «դեմ» է քվեարկելու»:
ԱԺ փոխխոսնակ Ալեն Սիմոնյանն արձագանքեց. «Ձեր թեկնածուի՝ օրենքով սահմանված փորձառությունը չի հերիքել: Մի քիչ անհասկանալի էր…»:
Կարդացեք նաև
ԲՀԿ անունից էլ պատգամավոր Սերգեյ Բագրատյանը հայտարարեց, Աննա Մարգարյանը, իրենց գնահատմամբ, բավարարում է ԲԴԽ անդամի թեկնածուի պահանջներին, բայց առաջադրման կարգը մրցակցային պետք է լինի. «Ցանկալի կլինի, որ այսուհետեւ աշխատենք օրենքի նախագծի վրա, որը թեկնածուի առաջադրման համար մրցույթ կսահմանի: Հանրությունը եւս պետք է գնահատի թեկնածուին»:
Լուիզա ՍՈՒՔԻԱՍՅԱՆ
