«Մարտի 1-ի» գործով մեղադրյալ ՀՀ 2րդ նախագահ Ռոբերտ Քոչարյանի փաստաբան Հայկ Ալումյանը նույն գործով փաստահավաք խմբի անդամ Սեդա Սաֆարյանի պնդումները, թե «Մարտի 1-ին» սպանվածների թիվը 10-ից ավելի է, առաջիկայում այլ բացահայտումներ կունենանք, համարում է Սեդա Սաֆարյանի ենթադրություն:
«Նույն աղբյուրներից են երեւի, որոնք որ մարտի մեկի ցերեկը ժողովրդին համոզում էին, որ առավոտ շուտ օպերայի մոտ ոստիկանները հինգ տարեկան երեխայի են սպանել, այդ նույն աղբյուրներից է»,- ասաց Հայկ Ալումյանը:
Ըստ նրա՝ որեւէ վերլուծության արդյունքում հնարավոր չէ նույնիսկ նման ենթադրություն անել. «Նման ենթադրություն ինձ մոտ չի ծագել»:
Անդրադառնալով Սեդա Սաֆարյանի մեկ այլ պնդման, թե Բաղրամյան 26-ի գաղտնի շտաբից բացի, մարտիմեկյան իրադարձություններից հետո եւս մեկ գաղտնի շտաբ է եղել գլխավոր դատախազությունում, Հայկ Ալումյանն ասաց. «Դա նույնպես հինգ տարեկան երեխային սպանելու մասին խոսակցությունների շարքից է, ես դրանք չեմ տարանջատում»:
Կարդացեք նաև
Ինչ վերաբերում է գնահատականներին, թե Քոչարյանի՝ կալանքի տակ գտնվելու հանգամանքով չեզոքանում է նրա կողմից վկաների վրա ազդելու հավանականությունը, Հայկ Ալումյանն ասաց. «Երբ օրենքն ասում է՝ ազատության մեջ գտնվելով կարող է այս անել կամ այն անել, նկատի չունի, որ նա ունակ է անել, այլ նկատի ունի՝ ենթադրվում է, որ կանի, կարող է բառն ունի երկու իմաստ, օրինակ՝ ես կարող է ձեզ հարցազրույց տամ այսօր, ես կարող եմ հարցազրույց տալ այսօր… այս դեպքում որեւէ մեկը որեւէ ձեւով, որեւէ չափով չի փորձել նույնիսկ հիմնավորել , որ այդպիսի զարգացումների հավանականություն կա: Այդ ամեն ինչը, որ ասում են, վերջում պետք է ավելացնեն՝ երկնքից ընկավ երեք խնձոր, մեկը սրան, մեկը նրան, որ ժանրի հետ բռնի»:
Արփինե ՍԻՄՈՆՅԱՆ
