Առայժմ վեթինգի իրականացման գործիքակազմն այլ կլինի, առանձին նախագիծ չի լինի: Այս մասին այսօր խորհրդարանում լրագրողների հետ զրույցում ասաց իշխող «Իմ քայլը» խմբակցության ղեկավար Լիլիթ Մակունցը: Նա մանրամասնեց, որ այլ գործիքակազմ ասելով նկատի ունի այն, որ կլինի որոշակի նախագծերի ընդունում`ԲԴԽ-ի, հակակոռուպցիոն մարմնին վերաբերող, որոնցով էլ կիրականացվի վեթինգը: Նախագծերի ընդունման ժամկետների մասին նա հստակ խոսել չի կարող, ասում է`աշխատատար եւ ժամանակ պահանջող գործ է, բայց իրենք ամեն ինչ անում են, որ հնարավորինս սեղմ ժամկետներում հասցնեն:
Հիշեցնենք, երեկ արդարադատության նորանշանակ նախարարը հայտարարել էր, որ վեթինգի մասին առանձին նախագիծ կլինի:
Երեկ նախարարը նաեւ ասել էր, որ արդեն միջազգային փորձաքննության է ուղարկվել առանց դատարանի վճռի գույքի բռնագանձման նախագիծը: Լրագրողները հետաքրքրվեցին` պատգամավորների հետ քննարկվե՞լ է նախագիծը: Լիլիթ Մակունցն ասաց, որ ինքը նախագծին ծանոթ չէ, ԱԺ պետաիրավական հարցերի հանձնաժողովի անդամները քննարկումներին մասնակցե՞լ են, թե`ոչ, տեղյակ չէ:
ՍԴ-ի շուրջ առաջացած ճգնաժամի մասին էլ «Իմ քայլի» ղեկավարը չխոսեց: Ասաց`ՍԴ-ում քննարկումներ են ընթանում, առաջարկները կներկայացվեն պատգամավորներին, կծանոթանան, հետո կարծիքներ կհայտնեն:
Կարդացեք նաև
Նելլի ԳՐԻԳՈՐՅԱՆ
