Ինչպե՞ս կազդի նվազագույն աշխատավարձի փոփոխությունները պաշտոնյաների աշխատավարձերի վրա`Aravot.am-ի եւ 168.am-ի հետ զրույցում պատասխանելով հարցին, «Իմ քայլը» խմբակցության անդամ, ԱԺ ֆինանսավարկային և բյուջետային հարցերի հանձնաժողովի փոխնախագահ Արտակ Մանուկյանն ասաց, որ նախագծի հեղինակներ Բաբկեն Թունյանի ու Վարազդատ Կարապետյանի առաջարկի տրամաբանությունն այն էր, որ պետական պաշտոնյաների աշխատավարձի բազային դրույքաչափի վրա ազդեցություն չունենա, որ սա միտված չլինի պետական աշխատողների աշխատավարձերի բարձրացմանը, այլ ունենա սոցիալական էֆեկտ:
«68 հազար դրամը, եթե առկա կարգավորումներում որևէ բան չփոխվի, որոշակի ռիսկեր այս մասով ստեղծում է»,- ասաց նա` հավելելով, որ կփորձեն այդ ռիսկերը մեղմել:
Հիշեցնենք, «Իմ քայլի» պատգամավորներն առաջարկել էին նվազագույն աշխատավարձի բարձրացում`սահմանելով 63, 5 հազար դրամ, սակայն, երեկ կառավարությունը որոշեց բարձրացնել նվազագույն աշխատավարձը` հասցնելով 68 հազար դրամի:
Արտակ Մանուկյանն, առհասարակ, նվազագույն աշխատավարձի բարձրացումը չափազանց կարևոր գործիք է համարում. «Եթե ճիշտ չես ընտրում առկա միտումները եւ չափից ավելի ես բարձրացնում նվազագույն աշխատավարձի շեմը, սա կարող է հավելյալ ռիսկեր բերել գործազրկության բարձրացման առումով: Պատգամավորը նկատում է` պետությունն ունի մի շարք սոցիալական պարտավորություններ, իսկ վերջին անգամ նվազագույն աշխատավարձի փոփոխություն եղել է 2014 թ-ին:
Կարդացեք նաև
Մանրամասները` տեսանյութում
Նելլի ԳՐԻԳՈՐՅԱՆ
