Վարչապետ Նիկոլ Փաշինյանը ՀՀ տնտեսական մրցակցության պաշտպանության պետական հանձնաժողովի անդամի թափուր պաշտոնում առաջադրել է տնտեսագետ, «Բարձրավոլտ էլեկտրական ցանցերի» գլխավոր տնօրենի նախկին խորհրդական, Սփյուռքի նախարարության աշխատակազմի գործերի նախկին կառավարիչ, Էկոնոմիակայի նախարարությունում առաջատար եւ առաջին կարգի մասնագետի պաշտոններ զբաղեցրած Կարեն Սեդրակյանի թեկնածությունը՝ մեկ տարի ժամկետով: ԱԺ-ն այսօր քննարկում է նրա թեկնածությունը:
ԼՀԿ պատգամավոր Արման Բաբաջանյանը նրան հարցրեց. «Ցորենի, այլուրի, ձեթի եւ շաքարավազի շուկաներն արդեն բնական մենաշնորհների տիրույթում են: Ինչպե՞ս լուծել խնդիրը, որպեսզի ավելի շատ ներմուծողներ լինեն: Այդ մենաշնորհների տերերը չունեն առավելություն, բացի նախկինում ունեցածն այսօր իներցիայի ուժով տարածելուց»:
Կարեն Սեդրակյանը պատասխանեց, որ պետությունը փորձում է վերացնել հնարավոր խոչընդոտները՝ ներմուծողներին համապատասխան հնարավորություն տալով. «Շուկան ազատ է, ով ուզում է, թող ներմուծի: Հավասար պայմաններ են ստեղծվել, որպեսզի տնտեսվարողները մտնեն շուկա: Վախ կա, թե այլ պատճառ, պատասխանները կփորձեմ տալ ընտրվելուց հետո՝ վերլուծություններ իրականացնելով այդ ոլորտներում: Ամեն դեպքում, կարծում եմ՝ պետությունն իր մասով գործառույթները կատարում է»:
Լուիզա ՍՈՒՔԻԱՍՅԱՆ
