Վարչապետ Նիկոլ Փաշինյանի կողմից ՀՀ տնտեսական մրցակցության պաշտպանության պետական հանձնաժողովի անդամի թափուր պաշտոնում առաջադրված թեկնածու Էդգար Ճաղարյանի հետ հարցուպատասխանի ժամանակ այսօր ԼՀԿ պատգամավոր Արման Բաբաջանյանը հետաքրքրվեց. «2018թ.-ին «Հարավկովկասյան երկաթուղիներ» ընկերության վարքագիծը որակվել էր որպես չարաշահող, սահմանվել էր երեսուն միլիոն դրամի տուգանք: Դուք ի՞նչ անելիքներ եք տեսնում այս հարցում»:
Էդգար Ճաղարյանն ասաց, որ պատրաստվում է խորն ուսումնասիրել այդ ընկերության հարցը. «Դիզվառելիքի տեղափոխման ծախսերի մի մեծ հատված երկաթգծով է իրականացվում: Հատուկ սակագին կա, որը տրվում է վառելիքի խոշոր ներմուծողներին: Լավ է, որ այն կա, եւ շատ ներմուծողների համար այն ավելի քիչ է, բայց երբ հատուկ սակագինը հիսուն տոկոսով ավելի է ցածր է գործող սակագնից, ես անբարեխիղճ մրցակցության դրսեւորում եմ տեսնեմ, որովհետեւ փոքր ներմուծողներին դաշտ մտնելու հնարավորություն չի տրվում»:
Բաբաջանյանը հետաքրքրվեց նաեւ, թե թեկնածուն ինչ դիտարկումներ ունի «Զվարթնոց» օդանավակայանի բարձր սակագների մասին: Էդգար Ճաղարյանը պատասխանեց. «Բավականին լավ օդանավակայան ունենք, բայց, ցավոք, սպասարկման գները կարծես թե չհիմնավորված…չէի ուզի այդ բառն ասել, բայց բարձր են: Այստեղ շատ մեծ դեր պետք է ունենա երկրորդ, օրինակ՝ Գյումրիի օդանավակայանի զարգացումը: Եթե այն կարողանա նորմալ մրցակցություն ապահովել, գների նվազեցում եւ լավ արդյունք կունենանք: Դա քայլերից մեկը կարող է լինել»:
ԼՀԿ պատգամավորը հակադարձեց. «Չի կարող մրցակցություն լինել, որովհետեւ Գյումրիի օդանավակայանը շահագործողը նույն ընկերությունն է»:
Կարդացեք նաև
Լուիզա ՍՈՒՔԻԱՍՅԱՆ
