ԱԺ-ում այսօր քննարկվում է ՀՀ անշարժ գույքի կադաստրի կոմիտեի աշխատանքի բարելավում ենթադրող օրինագիծը, ըստ որի՝ կադաստրի տարածքային գրասենյակներում մատուցվող որոշ ծառայություններից հնարավոր կլինի օգտվել առցանց:
Կոմիտեի ղեկավար Սարհատ Պետրոսյանը տեղեկացրեց, որ այս օրինագծով հնարավորինս կրճատվում է քաղաքացիների այցելությունը տարածքային գրասենյակներ: «Միայն որոշ դեպքեր կան, որոնց պարագայում քաղաքացին պարտավոր է այցելել գրասենյակ: Դա տեղի կունենա այն դեպքում, երբ քաղաքացին գործարքը նոտարի մոտ կնքելուց հետո նոտարն այն մուտք չի անի համակարգ, եւ քաղաքացին այն կբերի կադաստրի գրասենյակ՝ պետական գրանցում անելու, կամ երբ քաղաքացին առուվաճառքի գործարքը կկնքի կադաստրի գրասենյակում՝ առանց նոտարին այցելելու: Մնացած բոլոր դեպքերում փաստաթղթերը կստացվեն էլեկտրոնային տարբերակով եւ կպահպանվեն կայքում»,-նշեց Սարհատ Պետրոսյանը:
Նրա խոսքով՝ քաղաքացին կարող է իր կամեցած անձին տրամադրել այդ փաստաթղթերը. «Գույքի գրավադրման համար պահանջվող միասնական փաստաթուղթը ստանալու եւ այն բանկին ներկայացնելու համար քաղաքացին կարող է առցանց դիմել, բանկն էլ առցանց կարող է ստուգել այդ փաստաթուղթը»:
Հավելենք, որ օրինագիծը դեռ պետք է քվեարկվի խորհրդարանում:
Կարդացեք նաև
Լուիզա ՍՈՒՔԻԱՍՅԱՆ
