ՀՀ ԱԺ տնտեսական հարցերի մշտական հանձնաժողովը Բաբկեն Թունյանի նախագահությամբ հունիսի 27-ին հրավիրած արտահերթ նիստում քննարկել է պետական գույքի գրանցման, պետական տուրքի ոլորտներին առնչվող օրենսդրական նախաձեռնություններ:
Առաջին ընթերցմամբ քննարկվել է «Գույքի նկատմամբ իրավունքների պետական գրանցման մասին» ՀՀ օրենքում փոփոխություններ եւ լրացումներ կատարելու մասին» եւ կից նախագծերի փաթեթը:
Ըստ ՀՀ անշարժ գույքի կադաստրի պետական կոմիտեի ղեկավար Սարհատ Պետրոսյանի՝ ՀՀ օրենսդրությամբ պետական կառավարման տարբեր մարմինների տրվել են իրենց գործունեության ոլորտներին վերաբերող կադաստրների վարման առանձին գործառույթներ: Այդ մարմինները գործում են միմյանցից անկախ, տեղեկատվության հավաքագրման եւ կառավարման տարբեր մեթոդներով: Հաճախ անհրաժեշտ տեղեկատվությունը փոխանակելու համար առաջանում են որոշակի խնդիրներ:
Առաջարկվում է ներդնել ինտեգրված կադաստր, ըստ որի՝ համակարգված տարածական տեղեկատվության տրամադրումը հնարավորություն կտա իրականացնել իրավիճակի համալիր եւ համաժամանակյա վերլուծություն: Փոխկապակցված, հավաստի տեղեկության միջոցով հիմնավորված որոշումների ընդունումն առավել արդյունավետ կարող է լինել՝ կրճատելով համաձայնեցումների գրավոր ձեւերին տրամադրվող ժամանակը, ապահովելով ֆինանսական միջոցների եւ աշխատանքային ռեսուրսների խնայողություն, հասարակության իրազեկվածության մակարդակի բարձրացում:
Կարդացեք նաև
Կոմիտեի ղեկավարի հավաստմամբ՝ կնիքի պահանջի վերացման նպատակն է առանց կադաստր այցելելու առցանց ստանալ ավարտական փաստաթղթեր (վկայական, տեղեկանք եւ այլն): Արդյունքում կնվազեն նաեւ կոռուպցիոն ռիսկերը:
Նախագծով առաջարկվում է հանել իրավունքի գրանցման վկայականի կրկնօրինակի տրամադրման համար սահմանված վճարը, ինչպես նաեւ տրվում են մի շարք տեխնիկական բնույթի խնդիրներ առաջացնող հարցերի լուծումներ:
ՀՀ էկոնոմիկայի նախարար Տիգրան Խաչատրյանը նշել է, որ «Պետական տուրքի մասին» ՀՀ օրենքում փոփոխություններ կատարելու մասին» օրենքի նախագծի ընդունումը պայմանավորված է ներքին արտադրողի համար հումքային բազայով ապահովմամբ, մշակող արդյունաբերության ոլորտի գործունեությունը խթանելու անհրաժեշտությամբ:
Ներկայումս Հայաստանում գործում են շուրջ 30 մետաղագործական եւ մետաղամշակման ընկերություններ, որոնց արտադրանքն ամբողջությամբ կամ մասնակի հիմնված է տեղական մետաղական ջարդոնի եւ թափոնի օգտագործման վրա:Ներմուծված մետաղով աշխատելու դեպքում ընկերությունների արտադրանքի ինքնարժեքը կբարձրանա մի քանի անգամ` դարձնելով արտադրանքը ոչ մրցունակ: Առաջարկվում է պետական տուրք սահմանել արտահանվող ջարդոնի համար: Ըստ նախարարի՝ փոփոխությունները հնարավորություն կտան տեղական արդյունաբերական ընկերություններին օգտագործել տեղում առաջացած մետաղի ջարդոնը որպես հումք` ապահովելով վերջնական արտադրանքի համար մրցակցային գներ:
Երկրորդ ընթերցմամբ քննարկվել է «Պետություն-մասնավոր գործընկերության մասին» օրենքի նախագիծը, որով սահմանվում են պետություն-մասնավոր գործընկերության կարգավորման իրավական, կառավարման ինստիտուցիոնալ շրջանակները, ՊՄԳ ծրագրերի մշակմանը եւ իրականացմանն առնչվող կանոններն ու ընթացակարգերը, կիրառելի չափանիշները:
Պատգամավորներն առաջին ընթերցումից հետո առաջարկություններ չեն ներկայացրել:
Քննարկված նախագծերը ստացել են դրական եզրակացություն հունիսի 28-ի ԱԺ արտահերթ նստաշրջանի օրակարգում ընդգրկվելու համար:
Parliament.am
