Արդարադատության նախարար Ռուստամ Բադասյանը կառավարության այսօրվա նիստից հետո պատասխանելով լրագրողների հարցերին, որոնք առնչվում էին առանց մեղադրական դատավճռի գույքի բռնագանձմանը, ասաց, որ նախագիծն արդեն պատրաստ է եւ ներկայումս միջազգային փորձաքննության փուլում է. «ԵԽ կողմից փորձագիտական միջանկյալ կարծիք արդեն ստացվել է։ ՀՀ կառավարությունը սպասում է նաեւ մյուս միջազգային գործընկերների կարծիքին»։
Հարցին՝ արդյոք այն չի վնասի ներդրումային միջավայրին, պարոն Բադասյանը պատասխանեց՝ առանց մեղադրական դատավճռի գույքի բռնագանձումը բացասաբար չի ազդի ներդրումների վրա:
Կարդացեք նաև
Նախարարը նաեւ ծիծաղելի համարեց շահարկումները, թե այս նախագիծը ուղղված է հարուստ մարդկանց դեմ. «Սա հարուստ մարդկանց դեմ ուղղված չի կարող լինել»:
Ըստ նախարարի՝ օրենքում շատ խիստ դրված է բարեխիղճ ձեռքբերողի ինստիտուտը, որպեսզի ցանկացած գույքի բարեխիղճ ձեռքբերող չտուժի։ Եթե անգամ տվյալ գույքն ինչ-որ շրջանում եղել է ապօրինի, նույնիսկ այդ դեպքում բարեխիղճ ձեռքբերողից չի բռնագանձվի։
Նախարարից հետաքրքրվեցին՝ ինչպե՞ս է ի վերջո ապացուցվելու՝ մարդն անօրինակա՞ն է ձեռք բերել գույքը, թե՞ ոչ, ի պատասխան, պարոն Բադասյանն ասաց՝ այդ մեխանիզմները դրված են օրենքում։ Այն հարցին էլ՝ դատախազությո՞ւնն է որոշելու՝ մարդու գույքը օրինակա՞ն է, թե՞ ոչ, Ռուստամ Բադասյանը պատասխանեց, որ իրավասու մարմնի հարցն են լուծում. «Որոշվելու է դատարանի վճռով, ընտրված չէ դեռ դատարանը։ Եկեք մեկընդմիշտ ֆիքսենք՝ քանի որ դատավճիռը քրեական գործերին է վերաբերում, այս առանց դատավճռի տերմինը, նշանակում է, որ անձի մեղավորությունը քրեական դատավարության կարգով հաստատված լինելուն է վերաբերում, ոչ թե նրան, որ ՀՀ-ում հնարավոր է երբեւէ որեւէ մեկի սեփականության իրավունքին միջամտել առանց դատարանի»։
Նախարարի խոսքով, այն ուղղված է ոչ թե անձի, այլ գույքի դեմ. «Դատարանում որպես պատասխանող հանդես է գալու ցանկացած անձ, ով կարծում է, որ այդ գույքի հետ կապված իրավունք կա։ Այսինքն՝ այս դեպքում ոչ թե սահմանվում է պատճառահետևանքային կապ արարքի և հետևանքի միջև, այլ բարձրացվում է գույքի օրինականության ծագման հարցը»:
Լուսինե ԲՈՒԴԱՂՅԱՆ
