«Կոտայքի մարզի համայնքներից մեկի ղեկավարն իր հողամասերի քանակով Հայաստանում երրորդ հողատերն է»,- այս մասին այսօր խորհրդարանում լրագրողների հետ զրույցում ասաց Կոտայքի մարզպետ Ռոմանոս Պետրոսյանը: Համայնքի ղեկավարի անունը մարզպետը հրաժարվեց հրապարակել: Ասաց` քրեական գործ է հարուցված. «900 գյուղ ունենք Հայաստանում: Մեկ գյուղի գյուղապետը երրորդ հողատերն է ՀՀ մասշտաբով»: Լրագրողների հարցերին ի պատասխան ասաց, որ խոսքը Պտղնի գյուղի գյուղապետի մասին չէ: Մարզպետն անպատասխան թողեց հարցը`տվյալ գյուղապետը ԲՀԿ-ի հետ առնչություն ունի՞, թե՞ ոչ:
«Թղթերով ամեն ինչ կարգին էր, ինչպես ժամանակին ամենուրեք, բայց բարոյապես հո կարգին չէ՞ր»,- ասաց մարզպետը` հավելելով, որ օգտվելով օրենքի տված հնարավորությունից, կադաստրային արժեքների կես գնով աճուրդներ են հայտարարվել եւ հանրությանը «հավուր պատշաճի» չեն տեղեկացրել, այն դեպքում, երբ շուկայական արժեքները տասնապատիկ թանկ են: «Իրավական տեսակետից, ցավոք, անխոցելի է, բայց բարոյական տեսակետից կիսաքողարկված…»,- ասաց մարզպետը:
Լրագրողները հետաքրքրվեցին`բարոյապե՞ս եք դատելու: Մարզպետը պատասխանեց`գնահատականներ չի կարող տալ, քանի դեռ գործը քննվում է, բայց բոլոր մարզերում, բոլոր համայնքներում, որտեղ 10 տարուց ավելի համայնքապետերը ղեկավարել են, խնդիրներ կան: Ընդհանրապես, հողային ֆոնդի հետ կապված, մարզպետն ասում է`շատ անմխիթար ժառանգություն ենք ստացել:
Նելլի ԳՐԻԳՈՐՅԱՆ
