ԱԺ տնտեսական հարցերի հանձնաժողովի նիստում այսօր պատգամավորները քննարկեցին «Պետական տուրքի մասին» ՀՀ օրենքում փոփոխություններ կատարելու մասին օրինագիծը, որով պետտուրք է սահմանվում ՀՀ-ից մետաղական ջարդոն արտահանելու համար՝ առանց բացառությունների:
Թե ինչ բացառության մասին է խոսքը, Տնտեսական հարցերի հանձնաժողովի նախագահ, «Իմ քայլը» խմբակցության պատգամավոր Բաբկեն Թունյանը ներկայացրեց օրինագծի նախապատմությունը. «ՀՀ-ում դեռ 2012թ.-ից մետաղի ջարդոնի արտահանման համար տեղական արտադրողների հանդեպ սահմանվել էր 80.000 դրամի պետական տուրք, բայց եթե մետաղի ջարդոն արտահանողները կարողանում են համապատասխան հավաստագիր ձեռք բերել եւ մետաղի ջարդոնը ներկայացնել որպես տեղական, ջարդոնն առանց սահմանափակման եւ առանց պետական տուրքի՝ կարողանում են արտահանել: Նախորդ տարվա վերջից ՀՀ-ից մեծ քանակության՝ մոտ յոթ հազար տոննա մետաղի ջարդոն է արտահանվել, որովհետեւ այդ գործով զբաղվող կազմակերպությունները կայացել են»:
Բաբկեն Թունյանի բնորոշմամբ՝ հիմա կառավարությունը մտադիր է բացը փակել, այսինքն՝ մետաղի ջարդոնի արտահանումը հարկել պետական տուրքով՝ անկախ հայկական ծագման հավաստագրի առկայությունից. «Այս առնչությամբ վերջերս բողոքի ցույցեր կազմակերպեցին մի շարք փոքր կազմակերպություններ, որոնք զբաղվում են մետաղական ջարդոնի արտահանմամբ: Օրերս մենք հանդիպել ենք նրանց հետ, նաեւ՝ մեծ ընկերությունների հետ: Նրանք ասում են, որ թեթեւ մետաղական աղբ են արտահանում՝ մեքենաների թափքեր, մետաղյա տարաներ, եւ նրանց պետք է հնարավորություն տրվի առանց պետտուրքի արտահանել, որովհետեւ նաեւ բնապահպանական խնդիր են լուծում»:
Էկոնոմիկայի նախարար Տիգրան Խաչատրյանը նշեց՝ եթե ոչինչ չփոխեինք, այս տարի մետաղական ջարդոնի արտադրանքի ծավալը կգերազանցի 50 հազար տոննան. «Եթե այսպես շարունակվի, ՀՀ-ում մոտ 700 հազար տոննայի հասնող մետաղական ջարդոնի պաշարը կարող է ծառայել միայն մոտ 10-15 տարի՝ վտանգելով այն սպառող կազմակերպությունների գործունեությունը»:
Կարդացեք նաև
Հավելենք, որ օրինագիծը դեռ պետք է քննարկվի եւ քվեարկվի ԱԺ լիագումար նիստում:
Լուիզա ՍՈՒՔԻԱՍՅԱՆ
