Այսօր Երեւանի ավագանու նիստին «Լույս» խմբակցության ղեկավար Դավիթ Խաժակյանն ասաց, որ իրեն են դիմել Դավիթաշեն 1-ին թաղամասի բնակիչները, որոնք խնդրում են 61 մանկապարտեզի ու այդտեղ առկա ավտոտնակների միջեւ եղած ճանապարհահատվածում մայթ կառուցել, որպեսզի երեխաները անվտանգ կարողանան տեղաշարժվել: Խաժակյանն ասաց, որ բնակիչները ստորագրահավաք են կազմակերպել ու դիմել են Դավիթաշեն վարչական շրջանի ղեկավարին:
Հարցին արձագանքեց Դավիթաշենի թաղապետ Միքայել Թումասյանը, նա ասաց, որ ինքն անձամբ չի ուսումնասիրել խնդիրը, տեղակալին է հանձնարարել. «Բայց ոչ մի խոչընդոտ չեմ տեսնում, եթե չկան խանգարող ավտոտնակներ, որոնք պետք է քանդվեն, անպայման մայթը կկառուցվի»:
Ապա քաղաքապետի հորդորով Թումասյանը ներկայացրեց, թե այժմ ինչպիսի շինարարական աշխատանք է կատարվում Դավիթաշենում:
«Հսկայական տարածություն է՝ Փիրումյան փողոց-Եղվարդի խճուղի խաչմերուկ, ճեմուղի ենք կառուցում՝ 220 մետր, 3 մետրից ավելի լայնությամբ: Մեկ շաբաթից կհանձնենք շահագործման»,-ասաց Թումասյանը:
Կարդացեք նաև
Խաժակյանն էլ արձագանքեց. «Մի կատակ կա, ասում է՝ մեզ թուղթը պետք չի, մեզ գործն է պետք: Կոնկրետ այս հատվածը խնդրում եմ առաջնահերթությամբ լուծել, խոսքը աշակերտների անվտանգությանն է վերաբերում»:
«Վստահ եղեք, ամենակարճ ժամանակահատվածում կիրականացվի»,-հայտարարեց Թումասյանը:
Նելլի ԲԱԲԱՅԱՆ
