Այսօր Եվրոպայի խորհրդի Խորհրդարանական վեհաժողովի ամառային նստաշրջանի լիագումար նիստում ելույթ ունեցավ հայկական պատվիրակության ներկայացուցիչ ՀՀ ԱԺ պատգամավոր Միքայել Մելքումյանը
«Հարգելի գործընկերներ, Մտավոր սահմանափակումներ ունեցող մարդկանց ճակատագիրը մարդկության, բոլոր պետությունների և ժողովուրդների, կառավարությունների խնդիրն է: Սակայն թե ինչպես են այդ մարդկանց խնդիրները լուծվում հաճախ, ուղղակի անհասկանալի է: Որոշ երկրներում հոգեկան առողջության համակարգը համեմատաբար բարվոք վիճակում է, մյուսներում՝ միջին, կան երկրներ, որտեղ այս հարցերի լուծումը խայտառակ վիճակում է:
Կարծում եմ՝ այստեղ անհրաժեշտ են ինչպես օրենսդրական, այնպես էլ՝ վարչարարական խիստ, բայց մարդկային լուծումներ: Այո, օրենքները պետք է լինեն կենսունակ և մարդկային, իսկ դրանք իրականացնողները տվյալ դեպքում պետք է բառիս բուն իմաստով լինեն հումանիստներ:
Այն երկրներում, որտեղ այդ քաղաքացիների նկատմամբ առկա է անտարբեր վերաբերմունք, կարծում եմ՝ պետք է ընդհուպ նախատեսել քրեական պատասխանատվություն:
Կարդացեք նաև
Ճիշտ է, այդ հարցն ունի սահմաններ չունեցող բարոյական նշանակություն, բայց անտարբեր և արհամարհող մարդիկ մեր շրջապատում իրոք հաճախ եմ հանդիպում:
Արդյո՞ք առողջապահական գիտությունը և արդյո՞ք արհեստական ինտելեկտը կարող են առաջիկայում բեկում մտցնել իրերի վիճակի մեջ: Դա միայն Աստծուն է հայտնի: Բայց որ շանս կա այդ մարդկանց առավելագույն չափով ինտեգրել հասարակություն, դա էլ է ակնհայտ: Ուստի լինել մարդկային, սիրել սեփական աշխատանքը, դա նշանակում է լինել հայրենասեր, հարգել քեզ և քո ընտանիքին: Կարծում եմ՝ մոտ ապագան հենց երեխաների, աշակերտների և ուսանողների ճիշտ դաստիարակության մեջ է: Այնպիսի դաստիարակության, որը կտանի դեպի խորը գիտելիքների տիրապետման և կարիք ունեցող մարդկանց նկատմամբ արժանապատիվ մոտեցումների։
Այո, միշտ անկեղծությամբ և մաքսիմալ ջանքեր գործադրելով կօգնենք մտավոր կարիքավոր մեր հայրենակիցներին: Ի՞նչ եք կարծում, ո՞րն է մարդու հաջողության և հաջողված լինելու գաղտնիքը: Դա այն է, որ դու գերազանցում ես մյուսներին և ինքդ քեզ, բայց դա նաև այն է, որ դու ուրախանում ես ուրիշների հաջողություններով, այլ ոչ թե տխրում: Ուրեմն եկեք ուրախանանք, երբ օգնում ենք կարիքավորներին, և միշտ լինենք նրանց կողքին:
Աստված բոլորիս պահապան»:
Միքայել Մելքումյանի գրասենյակ
