Ուկրաինայի պատվիրակությունը դադարեցրել է աշխատանքը Եվրոպայի խորհրդի խորհրդարանական վեհաժողովում (ԵԽԽՎ): Այս մասին հայտարարել է պատգամավոր Բորիսլավ Բերյոզան:
Ավելի վաղ նա գրել էր, որ Ռուսաստանի պատվիրակության լիազորությունները վիճարկելուց հետո Ուկրաինայի պատվիրակությունը լքել է նիստերի դահլիճը: «ԵԽԽՎ նախագահն ընդունել է, որ Ռուսաստանի պատվիրակության լիազորությունների վիճարկումը հիմնավորված է, և ռուսների վրա կարող են պատժամիջոցներ կիրառվել»,- նշել էր նա:
Պատգամավոր Լեոնիդ Եմեցը հստակեցրել է, որ պատվիրակությունը չի կարող և իրավունք չունի որոշում կայացնել ԵԽԽՎ-ում Ուկրաինայի մասնակցության վերաբերյալ: Դա պետք է որոշի Գերագույն Ռադան: Բացի այդ, պատվիրակությունը դիմում է նախագահին և ԱԳՆ-ին՝ Եվրոպայի խորհրդի մարմիններում Ուկրաինայի հետագա մասնակցության հարցը որոշելու համար: «Այս պահին մենք դադարեցրել ենք մասնակցությունը Վեհաժողովի նստաշրջանում մինչև Ուկրաինայի որոշում ընդունելը»,- գրել է նա Facebook-ի իր էջում:
Հունիսի 26-ին Ուկրաինայի պատվիրակությունը ժամանակավորապես կվերադառնա նիստերի դահլիճ՝ Ռուսաստանի լիազորությունների բողոքարկմանը մասնակցելու: Ուկրաինան կպահանջի լիարժեք կերպով Ռուսաստանին զրկել լիազորություներից, ինչպես նաև կոմիտեներում ղեկավար պաշտոններ զբաղեցնելու իրավունքից:
Կարդացեք նաև
Հիշեցնենք, 2019թ. հունիսի 25-ին ԵԽԽՎ 118 պատգամավորներ որոշեցին, որ Ռուսաստանի պատվիրակությունը, որը 2015թ. հեռացվել էր նիստերից Ուկրաինայի դեմ ագրեսիայի պատճառով, կարող է վերադառնալ:
Պատրաստեց Վիկտորյա ԱՆԴՐԵԱՍՅԱՆԸ
