Ֆինանսավարկային եւ բյուջետային հարցերի մշտական հանձնաժողովի այսօրվա նիստում պատգամավորները քննարկեցին «Ապահովագրության եւ ապահովագրական գործունեության մասին» ՀՀ օրենքում լրացումներ եւ փոփոխություններ կատարելու մասին օրինագիծը, որը սահմանում է՝ քրեական հետապնդման ենթարկված եւ ենթարկվող անձինք ֆինանսավարկային կազմակերպություններում չեն կարող ունենալ 10%-ից ավելի մասնակցություն, ասել է թե՝ մասնաբաժին:
Ինչպես տեղեկացրեց ՀՀ Կենտրոնական բանկի նախագահի տեղակալ Ներսես Երիցյանը, օրինագիծը նպատակ ունի կանխարգելել հանցագործ անձանց գերակա կարգավիճակում հայտնվելը ֆինանսական համակարգում. «Բանկերի առնչությամբ կարգավորումներ կային, իսկ ֆինանսավարկային կազմակերպությունների առնչությամբ՝ ոչ»:
Պատգամավորներից մեկը հետաքրքրվեց՝ հանցագործ ասելով ի՞նչ նկատի ունեք, ո՞ր տեսակի մարդկանց մասին է խոսքը: Երիցյանը պատասխանեց. «Նրանք, ովքեր ենթարկվել են քրեական պատասխանատվության, ում հանդեպ դատական վճիռ կա, կամ դատաքննություն է ընթանում»:
Հանձնաժողովի դրական եզրակացությամբ օրինագիծն առաջիկայում պետք է քննարկվի եւ քվեարկվի ԱԺ լիագումար նիստի օրակարգում:
Կարդացեք նաև
Լուիզա ՍՈՒՔԻԱՍՅԱՆ
