Եվրախորհրդի հակակոռուպցիոն մարմինը (GRECO) հրապարակել է տարեկան զեկույց՝ գնահատելով GRECO անդամ 49 երկրներում կոռուպցիան կանխարգելելու իր հանձնարարականների իրականացումը 2018թ., հատկապես խորհրդարանականների, դատավորների և դատախազների մասով (GRECO-ի գնահատման 4-րդ փուլը ):
Զեկույցում նշվում է, որ 2018թ. վերջին GRECO անդամ գրեթե բոլոր երկրներն անցել են Գնահատման 4-րդ փուլով: Ամբողջ Եվրոպայում հանձնարարականների միայն 33.9%-ն է լիարժեք կատարվել:
Հայաստանը գնահատվել է 2014թ-ին և համապատասխանության առաջին զեկույցը հրապարակվել է 2017թ-ին: Ընդհանուր առմամբ GRECO-ն Հայաստանի համար առանձնացրել է 24 հանձնարարական: Այդպիսով, Հայաստանը չորրորդն է այն երկրների շարքում, որոնք ամենաշատ հանձնարարականներն են ստացել: Իսկ ամենաշատը ստացել են Թուրքիան (37 հանձնարարական), Հունաստանը (25) և Հյուսիսային Մակեդոնիան (25):
2018թ. վերջին Հայաստանին տրված 24 հանձնարարականներից լիարժեք իրականացվել է միայն 7-ը, մասամբ իրականացվել են 14-ը, իսկ 3-ն ընդհանրապես չեն իրականացվել:
Կարդացեք նաև
GRECO-ն Հայաստանին 7 հանձնարարական տվել էր պատգամավորների մասով. Դրանցից իրականացվել է միայն մեկը, մեկն ընդհանրապես չի իրականացվել, իսկ մնացած 5-ն իրականացվել են մասամբ:
Ինչ վերաբերում է դատավորներին, նրանց մասով 10 հանձնարարականներ լիարժեք իրականացվել են, 6-ն իրականացվել են մասնակի, իսկ մեկն ընդհանրապես չի իրականացվել:
Դատախազների վերաբերյալ GRECO-ի 7 հանձնարարականներից երեքն է կատարվել, մեկը չի կատարվել, իսկ մնացած երեքը կատարվել են մասամբ:
Պատրաստեց՝ Վիկտորյա ԱՆԴՐԵԱՍՅԱՆԸ
