Ինչպես արդեն տեղեկացրել ենք, ՀՀ Վերաքննիչ քրեական դատարանը ՀՀ երկրորդ նախագահ Ռոբերտ Քոչարյանին կալանավորելու որոշում կայացրեց: Դատարանը բավարարեց Գլխավոր դատախազության և տուժողի ներկայացուցիչ Սեդա Սաֆարյանի բողոքը:
Հիշեցնենք, որ Գլխավոր դատախազությունը բողոքարկել է մայիսի 18-ի՝ Երևան քաղաքի ընդհանուր իրավասության դատարանի՝ ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորման որոշումը փոփոխելու և նույն դատարանի մայիսի 20-ի՝ քրեական գործի վարույթը կասեցնելու և Սահմանադրական դատարան դիմելու որոշումը:
Դատական ակտի հրապարակումից հետո տուժող կողմի ներկայացուցիչ Սեդա Սաֆարյանը լրագրողների հետ զրույցում նշեց. «Գործի փաստերը եթե ուսումնասիրվեին, եթե առաջին ատյանի դատարանը տեսներ գործի մեծամասշտաբությունը, ապա կտեսներ Ռոբերտ Քոչարյանի դերը, ինչը որևէ մեկը չի կարող չընդունել: Կան ցուցմունքներ, որոնք չեմ հրապարակի, բայց երբ ժամանակ գտա, կհրապարակեմ: Այդ ցուցմունքներից մեկում երկրորդ նախագահը իրեն չենթարկվելու մասով ասում է՝ ես նրա մաման կլացացնեմ, դա նշանակում է, որ Ռոբերտ Քոչարյանը դեռ շարունակում է հասարակության և գործի քննության համար վտանգ ներկայացնել»:
Կարդացեք նաև
Լրագրողները Սեդա Սաֆարյանին հիշեցրին, որ նախագահող դատավոր Արմեն Դանիելյանին ինքնաբացարկ էր հայտնել, նա ասաց. «Ես դեռ չեմ մոռացել, թե ինքը ինչ անարդար վճիռներ է կայացրել»:
Այն, որ դատական նիստին ներկա չէին Ռոբերտ Քոչարյանի պաշտպանները, այս առիթով Սեդա Սաֆարյանն ասաց՝ իրենք գիտեին, որ սա խախտումներով կայացված վճիռ է:
Տաթև ՀԱՐՈՒԹՅՈՒՆՅԱՆ
