«Վարույթն իրականացվող մարմինը հանրությանը ներկայացնում է մի խեղաթյուրված գործ, որը հնարածին է և կարված Մանվել Գրիգորյանին և Նազիկի և նրանց հարազատների հետ»,- դատարանի դահլիճում այսպիսի դիրքորոշում հայտնեց Մանվել Գրիգորյանի պաշտպան Լևոն Բաղդասարյանը:
Ինչպես արդեն տեղեկացրել ենք, Երևանի ընդհանուր իրավասության դատարանի Կենտրոնի նստավայրում անցկացվում է ԱԺ նախկին պատգամավոր Մանվել Գրիգորյանի և նրա կնոջ՝ Նազիկ Ամիրյանի գործով դատական նիստը (նախագահող դատավոր Մնացական Մարտիրոսյան):
Լևոն Բաղդասարյանը հայտարարեց. «Մանվել Գրիգորյանին, Նազիկ Ամիրյանին մեղադրում են այն բանի մեջ, որ Երկրապահի պահեստներից յուրացրել են զինվորի սնունդ, որի տարածքը սեփականության իրավունքով պատկանում է Մանվել Գրիգորյանին: Ընդ որում, այդ սնունդի մի մասը ստացվել է ապրիլյան պատերազմի ժամանակ, մեկուկես տարի մնացել է Արցախի ԵԿՄ պահեստում, հետո երևանյան: Նրանց մեղադրում են ապօրինի զենք պահելու մեջ, քանի որ այն հայտնաբերվել է մի քանի հեկտար տարածության մեջ, որի սեփականատերը Մանվել Գրիգորյանն է: Դա նույնն է, որ դատախազության շենքում հայտնաբերվի ապօրինի զենք և մեղադրանք առաջադրվի ոչ թե շենքի պատասխանատուին, այլ շենքի սեփականատիրոջը՝ նույնն է կառավարության պետական լիազոր մարմնի գույքի կառավարման վարչությանը»:
Լևոն Բաղդասարյանը վստահեցրեց՝ մեղադրական եզրակացության մեջ չեք գտնի մի դրվագ, հղում ապացույցի, որ Մանվել Գրիգորյանը զենք է ձեռք բերել, փոխադրել, զենք է պահել: Իսկ Մանվել Գրիգորյանի առանձնատանը հայտնաբերված զենքն ու զինամթերքը եղել է օրինական: Ուստի ըստ Մանվել Գրիգորյանին մեղսագրվող արարքը դիտում ենք ակնհայտ անհիմն:
Կարդացեք նաև
Այս դիրքորոշումից հետո պաշտպանական կողմը հանդես եկավ դատական նիստը դռնփակ անցկացնելու միջնորդությամբ: Մասնավորապես հայտարարվեց. «Պաշտպանական կողմը մանրամասն ուսումնասիրել է քրեական գործի նյութերը և հանգել է եզրակացության, որ այնտեղ ռազմական գաղտնիք պարունակող արտահայտություններ, տեղեկություններ են հանդիպում, որոնք հիմք են հանդիսանում դատական նիստը դռնփակ անցկացնելու մասին: Պարբերաբար ապացույցների ենք հանդիպում, որոնցում երևում են, թե ապրիլյան քառօրյա պատերազմի սկզբնական ժամանակահատվածում ԵԿՄ-ի կողմից քանի զինվոր է ուղարկվել մարտական դաշտ, պարունակում են նաև անձի առողջության հետ կապված տվյալներ, որոնք ևս առողջական գաղտնիք են»:
Մեղադրական կողմը միջնորդությունը ժամանակավրեպ համարեց:
Նախագահող դատավորը պաշտպաններին խնդրեց դիրքորոշումը տպագիր տարբերակով ներկայացնել դատարանին և մեղադրական կողմին: Հայտարարվեց 15 րոպե ընդմիջում:
Տաթև ՀԱՐՈՒԹՅՈՒՆՅԱՆ
