Հարկային օրենսգրքի փոփոխությունների փաթեթը նպաստելու է, որպեսզի օտարերկրյա ներդրումները ՀՀ-ում տարեկան 1,5 տոկոսով ավելի լինեն: Այս մասին այսօր ԱԺ-ում Հարկային օրենսգրքում փոփոխություններ եւ լրացումներ կատարելու մասին օրինագծերի փաթեթի երկրորդ ընթերցման քննարկումների ժամանակ հայտարարեց Ֆինանսների փոխնախարար Արման Պողոսյանը: «Դա պայմանավորված է շահութահարկի դրույքաչափի նվազեցման հետ, աշխատուժի բեռի նվազեցման եւ այլնի հետ»,-նշեց նա: Փոխնախարարի խոսքով՝ այս օրինագծերի փաթեթի ընդունմամբ լուրջ հայտ ենք ներկայացնում՝ էականորեն բարելավելու ՀՀ ներդրումային գրավչությունը. «Ի դեպ, առաջիկայում կհրապարակվի Համաշխարհային բանկի հերթական զեկույցը՝ գործարար միջավայրի բարելավման միջոցառումների ծրագրի արդյունքների վերաբերյալ, եւ մենք ակնկալում ենք, որ էական առաջընթաց ենք ունենալու «հարկերի վճարում» ցուցիչով»:
Լուիզա ՍՈՒՔԻԱՍՅԱՆ
