Որոշակի վերանայումների արդյունքում կառավարության հեղինակած օրինագծերի փաթեթով ամրագրվել է, որ եթե հարկ վճարողը վիճարկում է հարկային մարմնի որոշումը, ապա հնարավորություն է ստանում գործել շրջանառության հարկի համակարգում՝ իրեն հատկացված երկամսյա ժամանակահատվածում համապատասխան հայց ներկայացնելով դատարան: Այս մասին այսօր ԱԺ-ում Հարկային օրենսգրքում փոփոխություններ եւ լրացումներ կատարելու մասին օրինագծերի փաթեթի երկրորդ ընթերցման քննարկումների ժամանակ հայտարարեց Ֆինանսների փոխնախարար Արման Պողոսյանը:
Նրա խոսքով՝ եթե դատարանը բավարարում է հարկ վճարողի հայցը եւ այդ կերպ հաստատում, որ հարկային մարմինը ոչ իրավաչափ որոշում է կայացրել, հարկ վճարողը պահպանում է իր կարգավիճակը՝ որպես շրջանառության հարկ վճարող եւ շարունակում է գործել որպես այդպիսին. «Իսկ եթե ոչ, հարկ վճարողն ընթացիկ տարվա հունվարի մեկից կհամարվի ավելացված արժեքի հարկ վճարող՝ վճարելով նաեւ այդ ընթացքում հարկերը չվճարելու համար սահմանված տույժերը»:
Լուիզա ՍՈՒՔԻԱՍՅԱՆ
