«Բարձրավոլտ էլեկտրական ցանցեր» ՓԲԸ-ում ՀՀ հաշվեքննիչ պալատի ստուգումների արդյունքում երկու դեպքի առթիվ նյութերն ուղարկվել են ՀՀ գլխավոր դատախազություն: Այս մասին այսօր ՀՀ հաշվեքննիչ պալատի 2018թ.-ի գործունեության վերաբերյալ տարեկան հաղորդման քննարկման ժամանակ այսօր ԱԺ նիստում հայտարարեց պալատի նախագահ Լևոն Յոլյանը: Նրա փոխանցմամբ՝ խախտումներն առնչվել են մրցույթների կազմակերպման գործընթացին. «Տրվել են պայմանագրով չնախատեսված միլիոնավոր դրամների կանխավճարներ: Այդ մրցույթները հիմնականում շահել են այնպիսի կազմակերպություններ, որոնք իրականում չեն բավարարել սահմանված մրցութային պահանջներին»:
Յոլյանը նաեւ նշեց, որ ԲԷՑ-ը չի կատարել միլիոնավոր դոլարների հասնող պայմանագրային պարտավորությունները. «2018թ.-ի ընթացքում նախատեսվում էր ավարտել վեց ենթակայանի վերակառուցումը, բայց 2018թ.-ի սեպտեմբերին աշխատանքի 20-44 տոկոսն էր միայն կատարվել»:
Լուիզա ՍՈՒՔԻԱՍՅԱՆ
