Հայաստանի կառավարությունը լիարժեք չի համապատասխանում թրաֆիկինգը բացառելու համար նվազագույն չափանիշներին, բայց այդ ուղղությամբ նշանակալի քայլեր է ձեռնարկում: Այս մասին ասվում է ԱՄՆ պետքարտուղարության «Մարդկանց թրաֆիկինգի մասին» 2019թ. զեկույցում:
Նախորդ հաշվետու ժամանակաշրջանի համեմատությամբ Հայաստանն էլ ավելի ակտիվ ջանքեր է գործադրել՝ կազմակերպելով արդյունավետ դասընթացներ իրավակիրառ մարմինների համար, իրավագիտակցության բարձրացմանն ուղղված տարբեր արշավներ, ընդունելով և սովորեցնելով 64 սոցիալական աշխատողների, որոնք կզբաղվեն նաև թրաֆիկինգի հարցերով և նախապես հայտնաբերելով թրաֆիկինգի որոշ զոհերի, ասվում է զեկույցում:
Այնուամենայնիվ, որոշ առանցքային հարցերում կառավարությունը չի համապատասխանեցրել իր քայլերը նվազագույն չափանիշներին, ուստի երկրորդ տարին անընդմեջ շարունակում է մնալ խնդրահարույց՝ երկրորդ խմբում: Մասնավորապես, զեկույցում նշվում է, որ կառավարությունը չի պատժել մարդկանց առևտրով զբաղվողներին և նախորդ տարիների համեմատությամբ դրանով զբաղվող ավելի քիչ մարդիկ են հետապնդման ենթարկվել:
Թրաֆիկինգի զոհերը պատշաճ հասանելիություն չեն ունեցել արդարադատությանը: Վերաինտեգրման համար ռեսուրսների, այդ թվում ժամանակավոր կացարանների և որդեգիր ընտանիքների պակասը, հանգեցրել է թրաֆիկինգի զոհերի կրկնակի վիկտիմիզացմանը և որոշ զոհերի անօթևան դառնալուն: Կառավարությունը չի իրականացրել աշխատաշուկայի ստուգում, ինչի հետևանքով չի բացահայտվել, քննվել կամ կանխվել թրաֆիկինգը դեպքերը:
Կարդացեք նաև
Զեկույցի հեղինակները Հայաստանի կառավարությանը խորհուրդ են տալիս փութաջանորեն քննել, հետապնդել և պատժել թրաֆիկինգով զբաղվողներին, մշակել այնպիսի ստանդարտ գործընթացներ, որոնք թույլ կտան հայտնաբերել թրաֆիկինգի զոհերին, ինչպես նաև վերապատրաստել պաշտոնյաներին նրանց հայտնաբերելու համար: Բացի այդ, զեկույցի հեղինակներն առաջարկում են մշակել և իրականացնել կանխարգելիչ միջոցներ՝ պետական վերահսկողության տակ գտնվող երեխաների խնամքի հաստատություններում երեխաների թրաֆիկինգը կանխելու համար, ինչպես նաև աշխատել Ռուսաստանի իշխանությունների հետ՝ թրաֆիկինգի զոհերին հայտնաբերելու համար:
Պատրաստեց՝ Վիկտորյա ԱՆԴՐԵԱՍՅԱՆԸ
