Քիչ առաջ ԱԺ պետաիրավական հարցերի հանձնաժողովի փոխնախագահ Աննա Կարապետյանն ուշագրավ հայտարարություն արեց լրագրողների հետ զրույցում:
Սահմանադրական դատարանի դատավոր ընտրված Վահե Գրիգորյանը hայտարարել էր, որ «մտնում եմ Սահմանադրական դատարան՝ ստանձնելով ՍԴ նախագահի լիազորությունների եւ պարտականությունների կատարումը»: Սա հակասական մեկնաբանությունների տեղիք է տվել:
Այս առնչությամբ մեկնաբանություն խնդրեցինք Աննա Կարապետյանից, նա պատասխանեցի, որ Սահմանադրությունում վիճելի է մեկնաբանությունը. «Վահե Գրիգորյանը արդեն պարզաբանել է, ես չեմ ուզում հիմա մեկնաբանել Գրիգորյանի հնչեցրած մտքերը»:
Հարցին՝ ձեզ համար անակնկա՞լ էր, որ նա ստանձնում է նաեւ ՍԴ նախագահի պարտականությունները՝ նա պատասխանեց, որ այդ պահին դահլիճում չի եղել. «Հետո, երբ լսեցի, այո, անակնկալ էր»:
Կարդացեք նաև
Նա ասաց, որ ՍԴ անդամները հատուկ ընթացակարգով չեն դառնում դատավորներ, ընդամենը պետք է ամրագրվեր, որ սրանից հետո նրանք պետք է պաշտոնավարեն՝ իբրեւ ՍԴ դատավորներ. «Դուք տեսնում եք, որ բացակայում են այդ լուծումները, իմ լուծումների մասին ես հետո կասեմ»:
Հարցին՝ ձեզ համար հարց չի՞ առաջացել, թե ո՞վ է հիմա ի վերջո նստելու ՍԴ նախագահի աթոռին, նա պատասխանեց. «Այս պահին ո՞վ է նստած, գիտե՞ք: Ես տեղեկություն չունեմ: Ըստ ինձ, Վահե Գրիգորյանը նման հայտարարություն է արել ու գնացել է այնտեղ, լուծումները կտեսնենք, ժողովուրդ, շատ եք շտապում»:
Մեր դիտարկմանը, որ Արփինե Հովհաննիսյանը հանցակազմ է տեսնում Վահե Գրիգորյանի հայտարարությունում՝ նա պատասխանեց. «Ես հանցակազմ չեմ տեսնում»:
Մեր դիտարկմանը՝ վստահաբար, ՍԴ-ն չի կարող երկու նախագահ ունենալ, ո՞վ է նախագահը լինելու՝ նա պատասխանեց. «Վստահաբար, երկու նախագահ չի կարող ունենալ: ՍԴ նախագահը պետք է լինի դատավոր»:
Հարցին՝ ՍԴ-ն այսքան ժամանակ ապօրինի՞ է գործել՝ նա պատասխանեց՝ «ոչ լեգիտիմ»:
Հարցրեցին՝ այսինքն, ՍԴ որոշումներն առ ոչի՞նչ են ճանաչվելու՝ նա պատասխանեց, որ որոշումների մասով որոշում կլինի, երբ ՍԴ անդամ-ՍԴ դատավոր հարցը կգա եզրահանգման:
Հռիփսիմե ՋԵԲԵՋՅԱՆ
