«Դուք «ղազինյանակա՞ն», թե «դավիթհարությունյանական» դպրոցի ներկայացուցիչ եք: Նրանք դեմ են դատաիրավական համակարգը վերափոխելու վերջին շաբաթների ջանքերին, որոնք ազդարարվել են ամենաբարձր մակարդակով»,-«Իմ քայլի» կողմից Բարձրագույն դատական խորհրդի անդամի թեկնածու առաջադրված Վիգեն Քոչարյանին ԱԺ նիստում այսօր այսպիսի հարցադրում ուղղեց «Լուսավոր Հայաստան» խմբակցության պատգամավոր Արման Բաբաջանյանը:
Վիգեն Քոչարյանը պատասխանեց. «Հարցադրումն ինչ-որ բան է ենթադրում: Օրինակ` այն, որ իրավաբանները կարող են լինել մեկ կամ մյուս ճամբարի ներկայացուցիչ, բայց կարծում եմ՝ այդ տարանջատումը չի համապատասխանում իրականությանը: Ինչ վերաբերում է անձանց, երկուսի հետ էլ երկար տարիներ հնարավորություն եմ ունեցել աշխատել: Պարոն Գագիկ Ղազինյանը ղեկավարում է ԵՊՀ իրավաբանական ֆակուլտետը, որտեղ դասավանդում էի, Դավիթ Հարությունյանի հետ էլ աշխատել եմ նախարարությունում՝ որպես փոխնախարար: Նրանցից որեւէ մեկի հետ չեմ քննարկել «վեթինգի» եւ անցումային արդարադատության հարցերը»:
Լուիզա ՍՈՒՔԻԱՍՅԱՆ
