Երեկ Ազգային Ժողովում Սահմանադրական դատարանի դատավոր ընտրված Վահե Գրիգորյանը դատավորի երդում տվեց։
Վահե Գրիգորյանը, մինչ երդման տեքստը արտաբերելը, հատուկ հայտարարությամբ հանդես եկավ և ազդարարեց, որ արտաբերելով «․․․․Հայաստանի Հանրապետության ժողովրդի առջև երդվում եմ․․․» բառերը նկատի է ունենալու բացառապես հայ ժողովրդին․«Ես ուզում եմ, որ բոլորդ իմանաք, երբ ես կարտաբերեմ այս բառերը ես նկատի եմ ունենալու, որ ՀՀ ժողովրդի առջև երդվում եմ, սակայն իմ երդումը տալիս եմ բացառապես հայ ժողովրդին: Եվ սա ոչ թե լիրիկական, և ոչ պաթոսալի վերապահում, սա շատ հստակ սահմանադրաիրավական նկատառումներով կատարվող ծանուցում է:
…..ՀՀ-ում իշխանությունը պատկանում է ժողովրդին, բայց ժողովրդի հավաքական կամքը ստորադաս է սահմանադրի կամքին, իսկ ՀՀ-ում սահմանադիրը բացառապես հայ ժողովուրդն է․․․․»։
ՍԴ նորընտիր դատավորի այս հայտարարությունը կարող վիրավորական լինել Հայաստանի Հանրապետությունում ապրող այլ ինքնություն ունեցող քաղաքացիների համար։ Վահե Գրիգորյանը, ըստ էության, Սահմանադրությամբ ամրագրված իրավահավասարությունը դնում է մի կողմ և աստիճանակարգում է հասարակությանը։ Նման խտրական հայտարարությունը ամենևին էլ հարիր չէ ՍԴ դատավորին։ Այն նաև կարող է խաթարել հասարակական համերաշխությունը։
Ելնելով այս ամենից՝ կարծում եմ, որ ՍԴ նորընտիր դատավոր Վահե Գրիգորյանը պետք է հավելյալ մեկնաբանությամբ հանդես գա և մանրամասնի, թե ի՞նչ նկատի ունի, երբ հայտարարում է, որ բացառապես հայ ժողովրդի առաջ է երդում տալիս։ Եվ արդյո՞ք սա կարող է նշանակել, որ նա դեմ է ՀՀ Սահմանադրության այն դրույթին, որով ՀՀ բոլոր քաղաքացիները ունեն հավասար իրավունքներ։
Բորիս Մուրազի
Սկսվեց․․․